तुळशी नदीवरील
लाकडी बरगे काढले
धामोड, ता. ११ : धामोड-कुरणेवाडी (ता. राधानगरी) येथील तुळशी नदीवरील कोल्हापूर पद्धतीच्या बंधाऱ्यावरील पाणी अडविण्यासाठी घातलेले लाकडी बरगे काढण्यात आले. दरवर्षी तुळशी नदीवरती शेती व पिण्याच्या पाण्यासाठी पाटबंधारे विभागाच्या वतीने बंधाऱ्याला लाकडी बरगे घातले जातात. गेल्या आठवड्यापासून येथे दमदार पावसाने हजेरी लावल्याने बरगे काढण्याचे काम सुरू आहे.
तुळशी नदीवर धामोडपासून आरे (ता. करवीर) अशा नऊ ठिकाणी शेती व पिण्याच्या पाण्यासाठी पाटबंधारे विभागाकडून लाकडी बरगे घातले जातात. धामोड-कुरणेवाडी दरम्यानच्या बंधाऱ्यांवर दरवर्षी लाकडी बरगे घालून पाणी अडवले जाते. त्यामुळे ८१ शेती वीजपंपांना या पाण्याचा शेतीसाठी उपयोग होतो. येथे गेल्या चार दिवसांपासून मृग नक्षत्रात दमदार पावसाने हजेरी लावल्याने बरगे करण्याचे काम सुरू केले आहे.