लाडक्या बहिणींची
धामोडला बॅंकेत गर्दी
धामोड : येथील युनियन बँक ऑफ इंडियाच्या शाखेत मुख्यमंत्री माझी लाडकी बहीण योजनेचा पहिला हप्ता जमा झाल्याचा संदेश आल्याने बँकेत लाडक्या बहिणीची बँकेत गर्दी झाली. बँकेमध्ये बंद पडलेले खाते सुरू करणे, केवायसी यासाठी गर्दी असून खात्यातून पैसे काढताना धावपळ होत आहे. योजनेसोबतच दैनंदिन व्यवहार करणारे, पेन्शनधारक तसेच इतर कामांसाठीही नागरिक बँकेत येत असल्यामुळे बँक कर्मचाऱ्यांची धांदल उडत आहे.
राधानगरी तालुक्याच्या पश्चिम परिसरात युनियन बँक ऑफ इंडिया राष्ट्रीयीकृत एकमेव बँक असल्याने मुख्यमंत्री लाडकी बहीण योजनेचे पैसे काढण्यासाठी महिलांची गर्दी होत आहे. येथे मध्यवर्ती चौकात बँकेत पैसे काढण्यासाठी महिलांची रांग लागली होती. योजनेंतर्गत महिलांना दरमहा १५०० रुपये दिले जाणार आहेत. योजनेचे पहिल्या दोन महिन्यांचे पैसे लाभार्थी महिलांच्या खात्यात जमा झाले. खात्यात पैसे आले की नाही, पैसे काढण्यासाठी सोमवारी (ता. २६ ) बँकेत लाडक्या बहिणींची झुंबड उडाली होती.