15241
गडहिंग्लज : आगारात लोकसहभागातून फलाटांच्या दुरुस्तीसह शोभिवंत झाडे लावली जात आहेत. (आशपाक किल्लेदार : सकाळ छायाचित्रसेवा)
--------------------------------------------
आगाराचा ‘लुक’ बदलू लागला
गडहिंग्लजला लोकसहभागातून सुविधा; रंगरंगोटी, कचरा कुंडी, विद्यार्थ्यांसाठी निवारा शेड
दीपक कुपन्नावर : सकाळ वृत्तसेवा
गडहिंग्लज, ता. १० : येथील आगाराचा लुक बदलू लागला आहे. लोकसहभागातून जागोजागी शोभिवंत झाडांच्या कुंड्या, कचरा कुंड्या आणि रंगरंगोटीमुळे आगाराचे रुपडे पालटले आहे. विद्यार्थ्यांसाठी स्थानकात निवारा शेडही उभाले आहे. निमित्त आहे बाळासाहेब ठाकरे स्वच्छ सुंदर आगार अभियानाचे. विशेष म्हणजे सर्वसामान्यांसाठी आधारवड असणाऱ्या एसटीसाठी लहान गावापासून, शिक्षण संस्था, बँकाचा मदतीसाठीचा पुढाकार मोलाचा ठरत आहे.
जिल्ह्यात कोल्हापूर, इचलकरंजी पाठोपाठ मोठे आगार म्हणून गडहिंग्लजची ओळख आहे. उपविभागामुळे आगाराचे उत्पन्नही मोठे आहे. पण, काही वर्षे कर्मचाऱ्यांच्या वेतनाशिवाय कोणतेच अनुदान नसल्याने विकासकामे ठप्प आहेत. परिणामी, सीमाभागातली हजारो प्रवाशांची ये-जा असूनही आगाराला अवकळा आली होती. मुलभूत सुविधांअभावी प्रवाशांची गैरसोयी वाढल्या होत्या. या पार्श्वभुमीवर बाळासाहेब ठाकरे स्वच्छ सुंदर आगार आभियानने विकासकामांना पालवी फुटली आहे.
आगारात सर्वच फलाटावर शोभिवंत झाडांच्या कुंड्या आणि कचरा कुंड्या ठेवल्या आहेत. आगारात साई मंदिर दिशेला विद्यार्थ्यांसाठी निवारा शेड उभारला आहे. हिरकणी कक्षाची दुरुस्ती आणि रंगरंगोटी केली आहे. आगारात महत्वाच्या ठिकाणी फलक लावले आहेत. मोडकळीस आलेल्या फलाटांची दुरुस्ती सुरु आहे. आगार परिसरातील खड्डे बुजवले आहेत. यासाठी विविध शिक्षण संस्था, तालुक्यातील ग्रामपंचायती, बँका, पतसंस्था, सहकारी संस्था यांची मदत घेतली जात आहे. राज्यातील सर्वच आगारात हे अभियान राबवले जाणार आहे. आगारातील सर्वच कर्मचारी, वाहक, चालक यासाठी विशेष प्रयत्नशील आहेत.
-------------------------
नियोजित सुविधा
-आगाराला कमान, प्रवेशद्वार
- संपूर्ण रंगरंगोटी
-पाण्याची टाकी, कपाऊंड दुरुस्ती
-सुचना फलक
-फरशी बसवणे
------------
निधी अभावी आगारातील विकासकामे ठप्प होती. महिनाभरापासून स्वच्छ सुंदर आगार आभियानतंर्गत लोकसहभागातून विकासकामे सुरु केली आहेत. सर्वच घटकांचा उस्फुर्त प्रतिसाद मिळत आहे.
- गुरुनाथ रणे, आगारप्रमुख, गडहिंग्लज