फोटो : मृत संकेत पाटील
...
माकडाने समोरच उडी मारली...
अन्‌ संकेत जीवाला मुकला
हिटणीमधील घटना : दुर्दैवी मृत्यूने हळहळ
सकाळ वृत्तसेवा
गडहिंग्लज, ता. २९ : ‘तो’ मित्रांसमवेत क्रिकेट खेळत होता. त्याच्या समोरच माकडाने उडी मारली. तो दचकला आणि भीतीने धक्का बसून बेशुद्ध पडला. दवाखान्यात नेले, परंतु तो तत्पूर्वीच जीवाला मुकला होता.
ही दुर्दैवी घटना हिटणी (ता. गडहिंग्लज) येथे शेतवडीत घडली. संकेत सुनील पाटील (वय ७) असे या दुर्दैवी मुलाचे नाव आहे. मंगळवारी (ता. २८) सायंकाळी उशिरा ही घटना घडली. संकेतच्या या मृत्यूने संपूर्ण गाव हळहळत आहे.
याबाबतची माहिती अशी, शाळांची उन्हाळी सुटी अजून सुरू आहे. या सुटीतील मुलांचा हमखास खेळ म्हणजे क्रिकेट. हिटणीतील संकेत हाही आपल्या मित्रांसमवेत क्रिकेट खेळायला गेला. वरदापगोळ वसाहतीत संकेतचे घर आहे. शेजारीच असलेल्या शेतवडीत ही मुले क्रिकेट खेळत होती. उशीर झाल्याने खेळ बंद करून इतर मुले घराकडे जाऊ लागली. संकेत हा बॉल आणण्यासाठी मागे राहिला. बॉल घेण्यास गेलेल्या संकेतच्या समोरच अचानक मोठ्या माकडाने उडी मारली अन्‌ संकेत मोठ्याने किंचाळला.
दरम्यान, घराकडे जाणारी मुले व शेजारीच असलेले लोक धावून गेले. तोपर्यंत तो निपचित पडला होता. त्याला उठवण्याचा प्रयत्न केला असता तो उठला नाही. यामुळे त्याला तातडीने संकेश्वर येथील खासगी दवाखान्यात उपचारासाठी दाखल केले, पण तत्पूर्वीच त्याचा मृत्यू झाला. या घटनेने घाबरून त्याला हृदयविकाराचा धक्का बसला असावा आणि तो त्यातच मृत्युमुखी पडला असण्याची श्यक्यता डॉक्टरांनी वर्तविली. संकेतचे आई-वडील शेती करतात. संकेतला एक मोठा भाऊ आहे. संकेत पहिलीत शिकत होता.