स्थानिक शालेय संघांची कसोटी
घाळी फुटबॉल लीग : बेळगाव, कोल्हापूरशी लढत; शौकिनांचे लक्ष वेधून

सकाळ वृत्तसेवा

गडहिंग्लज, ता. ७ : डॉ. घाळी शालेय फुटबॉल लीगमध्ये उद्या (ता. ८) स्थानिक संघांची कसोटी आहे. बेळगावचा सेंट झेवियर्स, केंद्रीय विद्यालयासह कोल्हापूरचा महाराष्ट्र हायस्कूल, कुडाळ हायस्कूलशी लढावे लागणार आहे. त्यामुळे येथील शालेय फुटबॉलपटूंच्या कामगिरीकडे शौकीनांचे लक्ष वेधून आहे. एम. आर. हायस्कूलच्या मैदानावर हे सामने होतील.
डॉ. घाळी लीग स्पर्धेच्या रौप्यमहोत्सवी वर्षानिमित्त यंदापासून स्पर्धेचे स्वरूप स्थानिक साखळी आणि बाद पध्दतीने केले आहे. दोन गटांत दहा संघांत साखळी पध्दतीने सामने झाले. यातून ‘अ’ गटात साधना हायस्कूलने चारही सामने जिंकत १२ गुणांसह अव्वल स्थान मिळविले. जागृती हायस्कूल, गडहिंग्लज हायस्कूलचे दोन विजय आणि एक बरोबरीमुळे प्रत्येकी सात गुण असले तरी सरस गोल फरकावर जागृती बाद फेरीसाठी पात्र ठरला. ‘ब’ गटात होरायझन स्कूलने एकतर्फी तीन सामन्यांत नऊ गुण मिळवत आरामात बाद फेरी गाठली. क्रिएटिव्ह, वि. दि. शिंदे आणि शिवराज स्कूल केवळ एकच विजयामुळे प्रत्येकी तीन गुणांवर राहिले. परंतु, सरस गोल फरकावर शिवराज नशीबवान ठरला.
महाराष्ट्र हायस्कूलचे राज्यस्तरावर वर्चस्व असून दरवर्षी डझनहून अधिक खेळाडू राष्ट्रीय स्पर्धेसाठी निवडले जातात. सेंट झेवियर्सने यंदाच्या राज्यस्तरीय स्पर्धेत तृतीय क्रमांक, तसेच दोन वर्षापूर्वी राष्ट्रीय स्तरावर सुब्रतो स्पर्धेत निवडला गेला होता. केंद्रीय विद्यालयाने कॅथोलिक, शिरगुपकर, मैदानी स्पर्धेचे विजेतेपद मिळविले आहे. या संघांसमोर स्थानिक संघांची खरी कसोटी आहे. सकाळच्या सत्रात उपात्यंपूर्व तर दुपारी उपांत्य फेरीचे आणि सायंकाळी अंतिम सामना होईल.

चौकट...
महाराष्ट्र, कर्नाटक आमनेसामने
महाराष्ट्राच्या शालेय फुटबॉलमध्ये मुंबईला कोल्हापूरचे तर कर्नाटकात अव्वल बंगळूरला बेळगावचे तगडे आव्हान आहे. त्यामुळे दोन्हीं राज्यातील अव्वल संघ या स्पर्धेच्या निमित्ताने आमनेसामने येणार आहेत. साहजिकच या दोन केंद्रातील बाजीगर कोण याचा फैसला उद्या होईल.