10154
अंबपवाडी : येथे नाला तुंबल्याने रस्त्यावरून पाणी वाहून खचलेला रस्ता.
----
मोरीअभावी रस्ता खचला
कासारवाडी-अंबपवाडी मार्गावर पावसाचे पाणी रस्त्यावर
संजय पाटील ः सकाळ वृत्तसेवा
घुणकी, ता. ११ : मुख्यमंत्री ग्रामसडक योजनेतून काम सुरू असलेल्या हातकणंगले तालुक्यातील कासारवाडी-अंबपवाडीदरम्यानच्या रस्त्यावर मोरी नसल्याने दोन दिवसांत झालेल्या पावसाचे पाणी रस्त्यावरून वाहून रस्ता खचला आहे.
कासारवाडी-अंबपवाडी-अंबप-तळसंदे-चावरे हा राज्य मार्ग ११९ क्रमांकाचा आहे. जोतिबा देवाकडे जाणारे भाविक या मार्गाचा अवलंब करतात. प्रत्येक रविवारी या मार्गावर वाहनांची वर्दळ असते. रस्त्याचे काम मुख्यमंत्री ग्रामसडक योजनेतून डिसेंबरपासून सुरू आहे. कासारवाडी व अंबपवाडीदरम्यान पोवार शेताजवळ रस्त्याच्या वरील बाजूला पाणी जाण्यासाठी नाला आहे; पण त्या नाल्यातून नैसर्गिकरित्या दुसऱ्या बाजूला जाण्यासाठी कोणतीही सुविधा अथवा मोरी बांधलेली नाही. दोन दिवसांपूर्वी झालेल्या मोठ्या पावसात डोंगर परिसर व शेतातून येणारे पाणी नाल्यातून पुढे न जाता रस्त्यावरूनच दुसऱ्या बाजूला गेले. त्यामुळे रस्त्यावर टाकलेला भराव खचून गेला. या रस्त्याची अवस्था अशीच राहिली तर पावसाळ्यात रस्त्यावरून पाणी वाहत जाऊन रस्त्याला भगदाड पडण्याची तसेच मोठ्या पावसात रस्ता वाहून जाण्याची भीती नागरिकांतून व्यक्त होत आहे.
----
अपघात होण्याची शक्यता?
पुणे-बंगळूर राष्ट्रीय महामार्गावरून अंबप-अंबपवाडी-कासारवाडी- गिरोलीमार्गे जोतिबा असा मार्ग आहे. जोतिबा यात्रेसह प्रत्येक महिन्यातील पौर्णिमा, रविवारी या मार्गावर वाहनांची गर्दी असते. रस्त्यावर पाणी वाहत राहिले तर रस्त्याला भगदाड पडून अपघात होण्याची शक्यता आहे.
---
या रस्त्यावरील साबळे खोरीत पांडुरंग पाटील यांच्या शेताजवळ आणि अंबप हद्दीत विठ्ठल चोपडे यांच्या शेताजवळ मोरी किंवा नळ टाकण्याची विनंती केली. तरीही दुर्लक्ष केले असून येथे मोरी न बांधल्यास पुढील काम होऊ देणार नाही.
-पांडुरंग खोत, अंबपवाडी.