03793
गारगोटी : येथे दागिन्यांच्या दुकानात खरेदीसाठी ग्राहकांनी केलेली गर्दी.
....
गारगोटीत अक्षय तृतीयेला
कोट्यवधींची उलाढाल

सोने-चांदी, वाहन, साहित्य खरेदीसाठी ग्राहकांची झुंबड

सकाळ वृत्तसेवा
गारगोटी, ता. १० : येथील बाजारपेठेत शुक्रवारी अक्षय तृतीयेच्या मुहूर्तावर खरेदीसाठी ग्राहकांनी मोठी गर्दी केली होती. सोने-चांदी, दुचाकी, चारचाकी वाहने, घरगुती उपकरणे, कपडे खरेदीसाठी ग्राहकांची झुंबड उडाली होती. यानिमित्त बाजारपेठेत कोट्यवधी रुपयांची उलाढाल झाली.
गारगोटी हे भुदरगड तालुक्याचे महत्त्वाचे ठिकाण. यामुळे येथील बाजारपेठ नेहमीच ग्राहकांसाठी सजलेली असते. अक्षय तृतीयेच्या मुहूर्तावर ग्राहक मोठी खरेदी करणार हे गृहीत धरून व्यापारी, उद्योजकांनी दुकाने साहित्य, वस्तूंनी सजविली होती. सकाळपासून खरेदीसाठी ग्राहकांची पावले दुकानाकडे वळत होती. ग्राहकांच्या चेहऱ्यावर खरेदी केल्याचा तर व्यापारी, विक्रेते यांच्या चेहऱ्यावर चांगली विक्री झाल्याचा आनंद पाहावयास मिळाला.
.....
हिंदू धर्मानुसार अक्षय तृतीयेचा दिवस शुभ मानला जातो. या मुहूर्तावर सोने खरेदीला विशेष महत्त्व असते. सोन्या-चांदीचे दागिने खरेदीसाठी रात्रीपर्यंत आमच्याकडे मोठी गर्दी होती. दराची चढाओढ असली तरी आजच्या दिवसाला महत्त्व असल्याने ग्राहक उत्स्फूर्तपणे व आनंदाने खरेदी करीत होते.
- संजय मालंडकर, मालंडकर ज्वेलर्स, गारगोटी