हातकणंगलेत तीन पान टपऱ्यांवर
‘अन्न,औषध’चा छापा : तिघांना अटक
हातकणंगले ता. १० ः अन्न व औषध भेसळ प्रतिबंधक विभागाच्या पथकाने आज येथे छापा टाकून तीन पान टपऱ्यांवर कारवाई करत तिघांना अटक केली. कारवाईत मोठ्या प्रमाणावर मावा व गुटखा जप्त केला. राजू वसंत निरमले (वय ३३, रा. नेज ता. हातकणंगले), नितीन रामचंद्र डोणे (वय ३७ रा. कुंभोज) व आरीफ मुबारक मुजावर ( वय २४ रा. हातकणंगले) अशी अटक केलेल्यांची नावे आहेत. याप्रकरणी कीर्ती देशमुख (अन्न सुरक्षा अधिकारी) यांनी दिलेल्या फिर्यादीवरून हातकणंगले पोलिस ठाण्यात गुन्हा दाखल झाला.
दरम्यान, एरव्ही राजरोस सुरू असलेल्या पान टपऱ्यांवर ऐन दिवाळीत ही कारवाई म्हणजे फार्स असल्याची चर्चा होती. याच विभागाच्या काही अधिकाऱ्यांनी दिवाळीच्या पार्श्वभूमीवर काही व्यापाऱ्यांकडून भेट घेतल्याची माहिती काही व्यापाऱ्यांनीच बोलून दाखवली. पोलिस ठाण्यानजीक मावा, गुटखा विकला जात असतानाही पोलिस यंत्रणा, नगरपंचायत प्रशासन किंवा अन्न व औषध भेसळ प्रतिबंधक विभागातर्फे ठोस कारवाई होत नाही. याबाबत दै. ‘सकाळ’ने वारंवार आवाज उठवला आहे.

कोट
उद्दिष्टपूर्ती कारवाया नेहमीच सुरू असतात. अधिकारी बदलांमुळे गेले काही महिने कारवाई झाली नव्हती. ती आज केली गेली. व्यापाऱ्यांच्या ‘भेटी’ची माहिती घ्यावी लागेल.
- दयानंद शिर्के, सहाय्यक आयुक्त (ग्रामीण) अन्न व औषध प्रशासन