मनसे दहीहंडी ‘गोडी विहीर’ने फोडली
सव्वा लाखांचे मानकरी ः हुपरीत सांस्कृतिक कार्यक्रमांचे आयोजन
सकाळ वृत्तसेवा
हुपरी, ता. १५ : मनसे व भगवा रक्षक संघटनेतर्फे येथे आयोजित सव्वालाख रुपये बक्षिसांची मनसे दहीहंडी शिरोळच्या गोडी विहीर गोविंदा पथकाने सात थर रचून फोडली. या वेळी झालेल्या सांस्कृतिक कार्यक्रमांनी दहीहंडी उत्सवात रंगत आणली.
येथील हुतात्मा स्मारक मैदानावर दहीहंडीचे आयोजन केले होते. गोडी विहीर गोविंदा पथकासह शिरोळमधील हनुमान व विजयसिंह आदी गोविंदा पथके सहभागी झाली होती. त्यांनी पाच ते सहा मनोरे रचून सलामी दिली. त्यानंतर गोडी विहीर गोविंदा पथकाने सातव्या मनोऱ्यावर दहीहंडी फोडली. विजेत्या पथकास मान्यवरांच्या हस्ते चषक व रोख रक्कम देऊन गौरवले.
शिवसनेचे (शिंदे गट) तालुकाप्रमुख अजित सुतार, शहरप्रमुख नितीन गायकवाड, मनसेचे शहरप्रमुख गणेश मालवेकर, चांदी उद्योजक नंदकुमार चव्हाण, उमाजी पाटील, माजी उपसरपंच धर्मवीर कांबळे, नीळकंठ गायकवाड, विद्याधर कांबळे, महादेव पाटील आदी उपस्थित होते. धनंजय खाडे व दीपक तोडकर यांनी सूत्रसंचालन केले.