05929
संग्रहित
--------
सेतू केंद्र आता इचलकरंजीतही
लवकरच सेवेत; सवलतीच्या दरात होणार नागरिकांची कामे
ऋषीकेश राऊत : सकाळ वृत्तसेवा
इचलकरंजी, ता.२८ : नागरिकांना विविध दाखले वेळेत मिळावेत, यासाठी राज्य सरकारने सुरू केलेले ‘सेतू केंद्र’ आता इचलकरंजीतही होत आहे. येथील जुन्या नगरपालिकेच्या इमारतीत जिल्ह्यातील हे तेरावे सेतू केंद्र काही दिवसांतच नागरिकांच्या सेवेसाठी सज्ज राहणार आहे. यामुळे स्वंतत्र अप्पर तहसीलदार कार्यालय झाल्यापासून गेल्या चार वर्षांची प्रतीक्षा आता संपली आहे.या केंद्राच्या माध्यमातून सवलतीच्या दरात वेळेत नागरिकांची शासकीय कामे होतील.
नागरिक आणि महसूल कर्मचाऱ्यांमध्ये दुवा ठरावा म्हणून राज्य सरकारने प्रत्येक तहसील कार्यालयात सेतू केंद्र उभारली आहेत. तहसील कार्यालयामार्फत दिला जाणारा जातीचा, रहिवासी, उत्पन्नाचा, नॉन क्रिमीलेअर असे विविध सरकारी दाखले देण्यासाठी सेतूची उभारणी केली. २०१९ मध्ये २० गावांसह इचलकरंजीसाठी स्वंतत्र अप्पर तहसील कार्यालय सुरू केले. जिल्ह्यातील हे पहिले अप्पर तहसिल कार्यालय असल्याने सुरुवातीच्या काळात सुविधा देताना अनेक अडचणी जिल्हा प्रशासनाला आल्या. या सुविधांमध्ये सेतू केंद्राचा प्रश्न प्रलंबित राहिला. चार वर्षे सेतू केंद्राविना महा ई सेवा केंद्रांवर नागरिकांना शासकीय कागदपत्रांसाठी अवलंबून रहावे लागले. सेतू केंद्र बंद असल्याने नागरिकांचे हाल झाले. प्रतीक्षेनंतर आता सेतू केंद्राचे काम अंतिम टप्प्यात आले आहे.
जुन्या नगरपालिका इमारतीत अप्पर तहसील कार्यालयाच्या बाजूलाच सेतू केंद्राचे काम चालणार आहे. गुजरात इन्फोटेक या खासगी कंपनीकडून सेतू केंद्रात नागरिकांना सर्व सुविधा मिळतील. या माध्यमातून एका छताखाली सर्व सुविधा मिळणार असल्याने ग्रामीण व शहरी भागातील नागरिकांना प्रमाणपत्रांसाठी आता इतर ठिकाणी चकरा माराव्या लागणार नाहीत. कार्यालय अंतर्गत येणाऱ्या २५ हून अधिक महा ई सेवा केंद्रासह सेतू केंद्रातून नागरिकांच्या शासकीय कामांना गती मिळणार आहे. यामुळे नागरिकांची विविध दाखले व कागदपत्रांसाठी होणारी हेळसांड यापुढे थांबणार आहे.

--------
दरावर नियंत्रण अन् पारदर्शकता
विविध प्रमाणपत्राचे दाखले, सातबारा हे महा-ई-सेवा केंद्रांमार्फत दिली जातात. किमान ३३ रूपये ६० पैसे सर्व प्रमाणपत्रांसाठी शासकीय फी आहे. मात्र, केंद्र चालक वाजवी दरापेक्षा जास्त पैसे घेतात. प्रमाणपत्र वितरीत करण्यास अडवणूक करून आर्थिक लुबाडणूक करतात व प्रमाणपत्रही वेळेवर दिले जात नाही, असा आरोप सातत्याने होतो. त्यामुळे आता सेतू सुविधा केंद्र सुरू केल्यानंतर शासनाने निश्चित केलेल्या वाजवी दरामध्ये व विहित मुदतीत जनतेला विविध प्रमाणपत्रांचे दाखले मिळतील, असा विश्वास अप्पर तहसीलदार शरद पाटील यांनी व्यक्त केला.