बनावट बिलाबद्दल
व्‍यापाऱ्यास कारावास
इचलकरंजी, ता. ६ : बनावट खरेदी विक्रीची बिले देवून शासनाच्या दीड कोटी रुपये महसूलाची हानी करणाऱ्या येथील व्यापाऱ्याला न्यायालयाने सक्त कारावासाची शिक्षा सुनावली. श्याम भवरलाल अरोरा (रा. खंजिरे इंडस्ट्रियल इस्टेट इचलकरंजी) असे त्याचे नाव आहे. याप्रकरणी येथील प्रथमवर्ग न्यायदंडाधिकाऱ्यानी त्याला दोषी ठरवले. एक वर्षाची सक्त कारावासाची शिक्षा व प्रत्येक कलमासाठी ५ हजार रुपये दंड तसेच दंड न भरल्यास अतिरिक्त ३ महिने अतिरिक्त सक्षम कारावासाची शिक्षा सुनावली.
२०१६ मध्ये जीएसटी भवन (पूर्वीचे विक्रीकर भवन) या कार्यालयाने बनावट खरेदी विक्री बिले देवून शासनाची दीड कोटींची महसूल हानी केल्याबद्दल येथील व्यापारी श्याम अरोरा याच्या विरोधात गुन्हा दाखल केला होता. याचा निकाल येथील प्रथम वर्ग न्यायालयातील न्यायदंडाधिकारी यांनी दिला. त्यानुसार अरोरा याला फौजदारी प्रक्रिया सहिता कलम तसेच महाराष्ट्र मूल्यवर्धित कर कायदा-२००२ च्या विविध कलमान्वये दोषी ठरवले. या प्रकरणाच्या अनुषंगाने कोल्हापूर विभागाच्या राज्यकर सहआयुक्त सुनिता थोरात यांनी अशा प्रकारच्या बनावट खरेदी विक्रीची बिले देवून शासनाची महसूल हानी करणा-या व्यापा-यांवर यापुढेही कडक कारवाई चालू ठेवण्याचा इशारा दिला आहे.