कुत्र्यांच्या हल्ल्यात माकडाचा मृत्यू

इचलकरंजी, ता. २३ : भटक्या कुत्र्यांच्या हल्ल्यात घोड्याच्या मृत्यूची घटना ताजी असतानाच आज भटक्या कुत्र्यांनी माकडावर हल्ला केला. या हल्ल्यात माकडाचा मृत्यू झाला. ही घटना आज सकाळच्या सुमारास नाईकनगर किरण गॅस भागात घडली. भागातील नागरिकांनी माकडाला वाचविण्याचा प्रयत्न केला. मात्र, तो अपयशी ठरला. नागरिकांनीच पुढे येत माकडावर विधिवत अंत्यसंस्कार करून दफन केले.
दोन भटक्या कुत्र्यांनी माकडावर अचानक हल्ला केला. यावेळी कुत्र्यांनी माकडाचे शरीरावर चावे घेत अनेक ठिकाणी लचके तोडले. भागातील नागरिकांनी त्वरित धाव घेऊन माकडाला वाचवण्याचा प्रयत्न केला. कुत्र्यांना हकलत माकडाला तावडीतून सुटका केली. प्राणीमित्र, नागरिकांची जखमी झालेल्या माकडाचा जीव वाचविण्यासाठी धडपड सुरू झाली. मात्र काही वेळानंतर माकडाचा मृत्यू झाला. मराठा महासंघाचे अध्यक्ष संतोष सावंत, आनंदा मकोटे, भाऊसाहेब सावंत, दत्तात्रय गवळी, अमोल कांबळे, रविंद्र शिंदे, अजय सावंत आदींनी त्या माकडावर विधीवत अंत्यसंस्कार करत त्याचे दफन केले. महानगरपालिकेने या भटक्या कुत्र्यांचा तातडीने बंदोबस्त करावा, अशी मागणी यावेळी संतप्त नागरिकांनी केली.

----