बेकायदेशीर १३ गॅस सिलिंडर जप्त
इचलकरंजीत दहशतवादविरोधी पथकाची कारवाई
इचलकरंजी, ता. १ : येथील पी. बा. पाटील मळ्यात दहशतवादविरोधी शाखेच्या पथकाने छापा टाकून बेकायदेशीर गॅस सिलिंडरचा साठा जप्त केला. या कारवाईत चारचाकी वाहनासह १३ गॅस सिलिंडर, गाडीत गॅस भरण्याची मोटर आणि रोख रक्कम असा दोन लाख १७ हजार ८०० रुपयांचा मुद्देमाल जप्त केला. याप्रकरणी महादेव विष्णू काडापुरे (वय ३३, रा. सहकारनगर), विवेक मुरलीधर पोतदार (वय ४८, रा. पाटण, जि. सातारा) या दोघांना अटक करून गावभाग पोलिस ठाण्यात गुन्हा दाखल केला आहे. मशीनच्या साहाय्याने गॅस सिलिंडरची १०० रुपये प्रतिकिलो दराने विक्री करताना ते रंगेहाथ सापडले.
पोलिसांनी दिलेली माहिती अशी, पी. बा. पाटील मळ्यात एका दुकानातून बेकायदेशीरपणे गॅस सिलिंडरचा साठा करून तो वाहनांमध्ये भरत असल्याची माहिती कोल्हापुरातील दहशतवादविरोधी शाखेला मिळाली. त्यानुसार भगवान आप्पासो भोसले यांच्या दुकानावर छापा टाकला असता अनधिकृतपणे घरगुती वापराच्या गॅस सिलिंडरमधून चारचाकी वाहनात गॅस भरत असल्याचे दिसून आले. यावेळी विविध कंपन्यांचे १३ घरगुती गॅस सिलिंडर, गाडीत गॅस भरण्याची मोटर मिळून आली. कारवाई करून पथकाने रोख एक हजार ५० रुपये, गॅस भरत असलेले चारचाकी वाहन तसेच गॅस भरण्याचे साहित्य असा दोन लाख १७ हजार ८०० रुपयांचा मुद्देमाल जप्त केला. याप्रकरणी दहशतवादविरोधी शाखेचे सहायक पोलिस निरीक्षक प्रकाश नगरे यांच्या फिर्यादीनुसार गावभाग पोलिस ठाण्यात गुन्हा दाखल झाला.