09065

तारदाळ : जे. के. नगर परिसरात पोलिसांनी गांजाचा साठा जप्त करून गांजा विक्री करणाऱ्या महिलेला ताब्यात घेतले.
...
तारदाळ येथे दीड किलो गांजा जप्त
आईसह मुलग्याला अटकः शहापूर पोलिसांची कारवाई
इचलकरंजी, ता. ३ : शहापूर पोलिसांनी गांजाचा साठा जप्त करून आज मोठी कारवाई केली. पत्र्याच्या घरातून महिलेला ताब्यात घेऊन सुमारे एक किलो ६०० ग्रॅम गांजा, रोख रुपये असा एकूण ५४ हजार ५७० रुपयांचा मुद्देमाल जप्त केला आहे. याप्रकरणी लक्ष्मी आनंदा गुरव (वय ५५, रा. जे. के. नगर तारदाळ), बारक्या ऊर्फ जयवंत आनंदा गुरव (रा. बोरगाव, जि. बेळगाव) या मायलेकरांवर शहापूर पोलिसांनी गुन्हा दाखल केला. ही कारवाई तुळजाभवानी अपार्टमेंटसमोरील मोकळ्या मैदानालगत आज सायंकाळी सात वाजण्याच्या सुमारास केली.
तारदाळ (ता. हातकणंगले) येथील तुळजाभवानी अपार्टमेंट जवळील जे. के. नगर परिसरात गांजा विक्री होत असल्याची माहिती शहापूर पोलिसांना मिळाली. याच भागात संशयित लक्ष्मी गुरव ही महिला पत्र्याच्या घरात राहते. संशयावरून पोलिसांनी सायंकाळी सात वाजण्याच्या त्या महिलेच्या घराची झाडाझडती घेतली. यावेळी घराच्या आडोशाला निळ्या रंगाच्या प्लास्टिकच्या पिशवीत मोठा गांजाचा साठा आढळून आला. पोलिसांनी महिला गांजा विक्रीसाठी वापरत असलेला वजन काटाही जप्त केला आहे. याप्रकरणी पोलिसांनी लक्ष्मी गुरव व तिचा मुलगा जयवंत गुरव या दोघांवर गुन्हा दाखल केला आहे. ही कारवाई पोलिस निरीक्षक सचिन सूर्यवंशी, पोलिस उपनिरीक्षक श्रीकृष्ण दरेकर, अविनाश मुंगसे, संतोष कांबळे, सुवर्णा गायकवाड आदींच्या पथकाने केली.
...
मुलगा आणतो, आई विकते
हिरवट पाने, फुले, काड्या व बिया संलग्न असलेला हा उग्र स्वरूपाचा सुट्या गाठी झालेला हा गांजा मिळून आल्याने पोलिसही अवाक झाले. यापूर्वी कारवाईत असा गांजा मिळून आला नव्हता. याबाबत महिलेकडे चौकशी केली असता मुलगा जयवंत हा गांजा विक्रीकरिता आणून देत असल्याचे निष्पन्न झाले. त्यामुळेच या परिसरात गांजा सहज मिळत असल्याचेही समोर आले.