06717
शिरोळ : नायब तहसिलदार योगेश जमदाडे यांना निवेदन देताना पदाधिकारी.
----------
कुणबी नोंदी तत्काळ शोधा
मराठा समाजातर्फे मागणी ः आंदोलनाचा इशारा
सकाळ वृत्तसेवा
जयसिंगपूर, ता.२८ : सरकारने अभ्यास करून व जुन्या कुणबी नोंदी शोध मोहीम हाती घेतली आहे. त्यानुसार शिरोळ तालुक्यातील नोंदी तपासणीसाठी मोडी लिपीसाठी तज्ञ नेमावा. तसेच महसूल, पंचायत समिती, भुमिअभिलेख यासह विविध विभागाकडील नोंदी तत्काळ शोधाव्यात. अन्यथा मराठा समाजाकडून तहसीलदार कार्यालयासमोर आंदोलन करण्यात येईल, अशा आशयाचे निवेदन शिरोळ तहसिलदार यांना मराठा समाजातर्फे दिले.
निवेदनात म्हटले आहे की, ‘मराठा समाजाला आरक्षण मिळावे, यासाठी राज्यभर मराठा योद्धा मनोज जरांगे-पाटील यांच्या नेतृत्वाखाली मराठा समाजाने उपोषण, साखळी उपोषण, सभा, जनजागृती रॅली अशी आंदोलने केली आहेत. त्यानंतर सरकारने कुणबी नोंदी शोधण्याची मोहीम हाती घेतली आहे. यात शिरोळ तालुक्यात फक्त एकच नोंद सापडली आहे. त्यामुळे तालुक्यातील सर्व विभागातील नोंद तत्काळ शोधाव्यात असे म्हटले आहे. हे निवदेन नायब तहसिलदार योगेश जमदाडे स्वीकारले. चंद्रकात जाधव-घुणकीकर, अभिजित भादिगिरे, बजरंग खामकर, रणजित महाडीक, तेजस कुराडे-देशमुख, सागर चौगुले, प्रकाश पवार, राजेंद्र दाईगडे, आनंदा खाडे आदी उपस्थित होते.