08139
उदगाव : श्री जोगेश्‍वरी यात्रेत गुरुवारी बलुतेदारांपैकी झालेले पिसे. (छायाचित्र ः अजित चौगुले, उदगांव)
----------
उदगावमध्ये जोगेश्‍वरी यात्रेला प्रारंभ
पिसे कार्यक्रम : गावातील उंबऱ्यावरील गुळ, खोबरे गोळा
सकाळ वृत्तसेवा
जयसिंगपूर, ता. ६ : उदगांव (ता. शिरोळ) येथील श्री जोगेश्‍वरी देवीच्या यात्रेला बुधवारपासून उत्साहात प्रारंभ झाला. बुधवारी रात्री सव्वा बारा वाजता दिवे काढणी कार्यक्रम झाला. त्यानंतर गुरुवारी यात्रेच्या मुख्य दिवशी सकाळी सहा वाजता पिसे कार्यक्रमाला सुरुवात झाली. त्यांनतर गावातील प्रत्येकाच्या उबंऱ्‍यावर ठेवलेले गूळ-खोबरे गोळा केले. त्यानंतर अग्नीप्रवेश केला.
भावुका आमावास्येच्या गुरुवारी मुख्य दिवसाच्या सकाळी बलुतेदारांपैकी लोक पिसे झाले होते. त्याच्या कमरेला व डोक्याला लिंबाचे डहाळे बांधून कबरेला घुंगरू बांधून उजव्या हातात लिंबाचे डहाळे व डाव्या हातात बाभळीची छडी देऊन गावातील प्रत्येक घरात जाऊन प्रत्येकांच्या उंबऱ्‍यावर ठेवलेला गूळ, खोबरे घेऊन तांब्यातील पाणी दाराच्या चौकटीला मारले. त्यानंतर सर्व पिसे एकत्रित कलेश्वर मंदिराजवळ आल्यानंतर श्री मारुती मंदिराजवळ सर्व पिशांना अग्निप्रवेश दिला.
पकंज आंबी, सचिन कोळी, संदीप माने, विशाल ठोमके, दीपक कुंभार, बंडू सुतार, प्रशांत मडिवाळ या बलुतेदारांपैकी पिसे झाले होते. यात्रेनिमित्त उदगांव येथे सांगली- कोल्हापूर माहामार्गावरील बसस्थानक परिसरात आंबा विक्रीसाठी सुमारे दीडशेंहून अधिक विक्रेते आल्याने आंबा खरेदी-विक्रीत लाखो रुपयांची उलाढाल झाली.
रत्नागिरी हापूस, देवगड हापूस, पायरी, तोतापुरी यांसह विविध प्रकारचे आंबे उदगांव बाजारपेठेत मोठ्या प्रमाणात उपलब्ध झाले होते. यात्रेनिमित्त खेळणी व पाळण्याचे स्टॉल लागले आहेत. इचलकरंजी, मिरज, कुरुंदवाड, सांगली, कोल्हापूर येथून उदगांव येथे येत असलेल्या बसेस भरून येत आहेत. त्यामुळे उदगांव मार्गावर जादा एसटी बसेस सोडण्याची प्रवाशांची मागणी आहे.