02203
गणेशवाडीत विजेच्या धक्क्याने तरुण ठार
कसबा बीड : घराच्या बांधकामांवर पाणी मारत असताना विजेचा शॉक लागून गणेशवाडी (ता.करवीर) येथील तरूणाचा मृत्यू झाला. साहिल भिवा चव्हाण (वय १८) असे त्याचे नाव आहे. ही घटना दुपारी तीनला घडली. या घटनेची नोंद करवीर पोलीस ठाण्यात झाली.
घटनास्थळावरून मिळालेली माहिती अशी, येथील लाड गल्लीत चव्हाण कुटुंबियांचे घराचे बांधकाम सुरू आहे. दुपारी तीनला साहिल बांधकामावर पाणी मारण्यासाठी गेला. मोटर चालू झाल्यावर त्याला विजेचा धक्का बसला. दुपारची वेळ असल्याने ही घटना लवकर लक्षात आली नाही. इमारतीच्या मागील बाजूस गवंडी गिलावा करण्यात व्यस्त होते. गवंड्याने पाहिल्यावर ही घटना लक्षात आली. तातडीने त्याला उपचारासाठी दवाखान्यात दाखल केले. पण तत्पूर्वीच त्याची प्राणज्योत मालवली होती. त्याच्या मृत्यूची बातमी समजताच कुटुंबियांनी हंबरडा फोडला. साहिलच्या मागे आई-वडील, भाऊ, चुलता, चुलती, आजी, आजोबा असा परिवार आहे.