कबनूर उरुसामुळे वाहतूक मार्गात बदल

कबनूर, ता. १४ ः येथील ग्रामदैवत जंदिसाहेब व ब्रॉनसाहेब उरुसानिमित्त बुधवार (ता.१५) ते २२ मार्चदरम्यान वाहतूक सुरळीत ठेवण्यासाठी व वाहनांना सुरक्षित पार्किंग उपलब्ध करुन देण्यासाठी पोलिस अधीक्षक शैलेश बलकवडे यांनी उरुस काळात कबनूर व परिसरातील वाहतुक मार्गात बदल केला आहे.
वाहतुकीसाठी बंद व चालु केलेले मार्ग असे ः कोल्हापूरकडून येणाऱ्या सर्व वाहनांसाठी कबनूर ओढा ते शाहू पुतळा आणि शाहू पुतळा ते कबनूर सर्व प्रकारच्या वाहनाना बंदी घातली आहे. कोल्हापूरकडून येणारी थांबे घेणारी एसटी बस कबनूर ओढा केटकाळे बोरवेल मार्गे पंचगंगा साखर कारखाना, नवीन नगरपालिका चौक, डॉ. बाबासाहेब आंबेडकर पुतळा ते एसटी स्टॅण्ड असे राहील. तसेच परत इचलकरंजी एसटी स्टॅण्डहून कोल्हापूरला जाणारी त्याच मार्गाने परत जाईल.
कोल्हापूरकडून येणारी सर्व अवजड वाहने तसेच विनाथांबा कोल्हापूर-इचलकरंजी एसटी बस अतिग्रे फाटा हातकणंगले मार्गे इचलकरंजीकडे येतील तसेच इचलकरंजीहून कोल्हापूरकडे जाणारी अवजड वाहने छत्रपती शिवाजी महाराज पुतळा, डॉ. आंबेडकर पुतळा, नवीन नगरपालिका चौक, पंचगंगा साखर कारखाना, कोरोची हातकणंगले मार्गाने कोल्हापूरला जातील. कोल्हापूरहून इचलकरंजीकडे येणारी हलकी वाहने कबनूर ओढा केटकाळे बोरवेल मार्गे पंचगंगा कारखाना,नवीन नगरपालिका चौक असे येतील.
नदीवेश नाका इचलकरंजीकडून कोल्हापूरकडे जाणारी हलकी वाहने उत्तम प्रकाश टॉकीज संभाजी चौक, शाहू पुतळा, नवीन नगरपालिका चौक, पंचगंगा साखर कारखाना, कबनूर ओढा मार्गे कोल्हापूरला जातील. इचलकरंजीहून चंदूरकडे जाणारी एसटी बस व इतर वाहने शाहूपुतळा,तीनबत्ती चौक,सुर्वेनगर, शाहूनगर,चंदूरला जाईल व त्याच मार्गाने परत येतील.
कबनूर हददीतील पार्किंग व्यवस्थमध्ये इचलकरंजी शहरातून शाहू पुतळा मार्गे जाणारी दुचाकी, चारचाकी वाहने कोल्हापूर नाकाजवळील यशोलक्ष्मी मंगल कार्यालय बाजूचे मैदान व रोडकडेला. कोरोची, शहापूरकडून येणारी दुचाकी व चारचाकी वाहने पंचगंगा कारखाना दक्षिण बाजूचा गाडी अड्डा मैदान. कोल्हापूरकडून येणारी रुई, साजणी, तिळवणीकडून येणाऱ्या वाहनांना कबनूर ओढा पुलाजवळील मोकळे शेत जमीन येथे पार्किंगची सोय केली आहे.