‘संजय गांधी, श्रावणबाळ’चे पैसे थेट बँकेत ट्रान्‍स्‍फर

जून १३ डेटलाईन; जिल्ह्यातील सर्व लाभार्थ्यांची खाती होणार अपडेट

कुंडलिक पाटील ः सकाळ वृत्तसेवा

कुडित्रे, ता. ६ : संजय गांधी, श्रावणबाळ व सर्व पेन्शन योजनांचे पैसे बँक कामकाजामुळे वेळेवर मिळत नव्हते. ही वेळखाऊ पद्धत बंद होणार आहे. शासनाकडून लाभार्थ्यांच्या थेट बँकेतील खात्यात, पेन्शन योजनेचा लाभ देण्यात येणार असून वेळेत व डायरेक्ट पैसे बँक ट्रान्‍स्‍फर होणार आहे. त्यामुळे पैसे बँकेत खात्यावर आले का हे पाहण्यासाठी होणारे हेलपाटे बंद होणार आहेत. या प्रणालीमध्ये ४४ हजार लाभार्थ्यांची खाती अपडेट केली आहेत. उर्वरित ऑनलाईन कामकाज १३ जूनपर्यंत पूर्ण करण्याचे उद्दिष्ट जिल्हाधिकारी कार्यालय महसूल यंत्रणेने ठेवले आहे.

जिल्ह्यात संजय गांधी निराधार, श्रावणबाळ, इंदिरा गांधी अशा विविध पेन्शन योजना सुरू आहेत. यामध्ये जिल्ह्यात संजय गांधी निराधार योजनेमध्ये ६७ हजार तर श्रावणबाळ योजनेमध्ये ७८ हजार लाभार्थी आहेत. यापूर्वी राज्य शासनाकडून जिल्हाधिकारी यानंतर तहसीलदार यानंतर बँकेत अशा टप्प्यामध्ये पैसे दिले जात होते. यामुळे लाभार्थ्यांना वेळेवर अनुदान मिळत नव्हते आणि बँकेत लाभार्थी हेलपाटे मारत होते. यानंतर राज्यभरात डायरेक्ट बँक ट्रान्‍स्‍फर (डीबीटी) प्रणाली सुरू केली आहे. यामध्ये राज्य शासनाकडून थेट अनुदान लाभार्थ्याच्या बँक खात्यावर ट्रान्‍स्‍‍फर होणार आहे.
जिल्हाधिकारी कार्यालयात युद्धपातळीवर डायरेक्ट बँकेत अनुदान ट्रान्‍स्‍फर करण्यासाठी काम सुरू आहे. डीबीटी पोर्टलवर माहिती भरण्यास कोल्हापूर जिल्हा राज्यात प्रथम क्रमांकावर आहे. वयस्कर लाभार्थ्यांचे मोबाईल नंबर नाहीत, अशावेळी घरातील कोणाचाही मोबाईल नंबर बँकेमध्ये लिंक करावा लागणार आहे. आवश्यक माहिती तलाठी यांच्याकडे लाभार्थ्यांनी द्यावी, असे आवाहन संजय गांधी तहसीलदार करवीर विजय जाधव यांनी केले आहे.

चौकट
एका क्लिकवर लाभ
आजपर्यंत संजय गांधी योजनेत २२.९९३, ‘श्रावणबाळ’मध्ये २१ हजार लाभार्थ्यांचे काम अपडेट झाले आहे. १३ जूनपर्यंत सर्व लाभार्थ्यांचे बँक खाते चेक करून कॉमन डेटाबेस तयार केला जाणार आहे. यामुळे एका क्लिकमध्ये वेळेवर लाभार्थ्यांना लाभ मिळणार आहे.

कोट
संजय गांधी, श्रावणबाळ पेन्शन योजनेमध्ये लाभार्थ्यांचा कॉमन डेटाबेस होणार आहे. पेन्शन योजनेचा लाभ डायरेक्ट बँक खात्यावर ट्रान्‍स्‍फर होणार आहे. १३ जूनपर्यंत सर्व कामकाज पूर्ण करण्याचे उद्दिष्ट आहे.
- डॉ. संपत खिलारी, उपजिल्हाधिकारी महसूल,