‘कुंभी-कासारी’ची एफआरपी आदा
कुडित्रे : येथील कुंभी-कासारी सहकारी साखर कारखान्याची हंगाम २०२५-२६ ची ‘एफआरपी‘ ३५६० रुपयेप्रमाणे ऊस बिले ऊस पुरवठाधारकांना दिल्याची माहिती कारखान्याचे अध्यक्ष आमदार चंद्रदीप नरके यांनी दिली. कारखान्याने हंगाम २०२५-२६ मध्ये ४,८८,८७० टन ऊस गळीत करुन ६,१५,३५० क्विंटल साखर पोत्यांचे उत्पादन केले आहे. सरासरी साखर उतारा १२.५५ टक्के राहिला आहे. हंगाम सुरुवातीपासून ते १५ जानेवारीअखेर ऊस बिले दिली आहेत. उर्वरित १६ जानेवारी २०२६ ते हंगाम संपेपर्यंतच्या गळीतास आलेल्या १,६५,१५० टन उसाची बिलाची रक्कम ५८ कोटी ७९ लाख ३७ हजार रुपये ३१ मार्चला ऊस पुरवठाधारकांच्या बँक खात्यावर वर्ग केले. कारखान्याने एफआरपीप्रमाणे ऊस बिलाची रक्कम १७४ कोटी ०३ लाख ८० हजार रुपये दिली आहे. हंगाम २०२६-२७ साठी ऊसतोडणी वाहतूक करार सुरू केले आहेत. गळीताचे उद्दिष्ट पूर्ण होण्यासाठी शेतकऱ्यांनी उसाची नोंद करावी. पिकवलेला ऊस गळीतास पाठवावा; असे आवाहन चंद्रदीप नरके यांनी केले. यावेळी उपाध्यक्ष राहुल खाडे, संचालक मंडळ, कार्यकारी संचालक धिरजकुमार माने, कामगार प्रतिनिधी उपस्थित होते.