विक्रमसिंह घाटगे आदर्श शिक्षक
पुरस्कारासाठी अर्जाचे आवाहन
कागल, ता. १० : जिल्ह्यात प्राथमिक, माध्यमिक तसेच उच्च माध्यमिक शिक्षण क्षेत्रात उत्कृष्ट कार्य केलेल्या शिक्षकांना सहकारातील आदर्श स्व.राजे विक्रमसिंह घाटगे यांच्या नावाने आदर्श शिक्षक पुरस्कार दिला जातो. २०२३ -२४ वर्षाच्या पुरस्कारासाठी इच्छुकांनी प्रस्ताव २० जुलैपर्यंत पाठवावेत, असे आवाहन राजमाता जिजाऊ महिला समितीच्या कार्याध्यक्षा नवोदिता घाटगे यांनी केले आहे. शाहू ग्रुपच्या मार्गदर्शिका व शाहू साखर कारखान्याच्या अध्यक्षा श्रीमती सुहासिनीदेवी घाटगे, शाहू ग्रुपचे अध्यक्ष समरजितसिंह घाटगे व राजमाता जिजाऊ महिला समितीच्या कार्याध्यक्षा नवोदिता घाटगे यांच्या संकल्पनेतून तीन वर्षांपासून पुरस्कार देण्यात येतो. २०२२ - २३ च्या पुरस्कारांची घोषणा स्व.राजे विक्रमसिंह घाटगे यांच्या ७५ व्या जयंतीदिनी २८ जुलैला होईल. विहित नमुन्यात प्रस्ताव श्रीमंत जयसिंगराव घाटगे वि.मं. हायस्कूल व ज्यू.कॉलेज (शिक्षण संकुल) कागल येथे दिलीप निकम यांच्याकडे सादर करावेत, असे आवाहन केले आहे.