कागलला आज छत्रपती शिवाजी
महाराज महाराजस्व समाधान शिबिर

कागल, ता. १९ : कागल तहसील कार्यालयाच्या वतीने कागल मंडलअंतर्गत शुक्रवारी (ता. २०) सकाळी १० वाजता बहुउद्देशीय सभागृह, कागल तहसील कार्यालय येथे छत्रपती शिवाजी महाराज महाराजस्व समाधान शिबिर आयोजित केले आहे. शिबिरास वैद्यकीय शिक्षणमंत्री हसन मुश्रीफ उपस्थित राहणार असल्याची माहिती तहसीलदार अमरदीप वाकडे यांनी पत्रकाद्वारे दिली आहे .
शिबिरात प्रामुख्याने तहसील कार्यालयाच्या वतीने जातीचे, डोमेसाईल, नॉन क्रिमिलेयर दाखले व इतर दाखले तसेच ई-रेशनकार्ड उपलब्ध करून देणे, रेशन कार्डमधील नावे कमी-जास्त करणे व इतर अनुषंगिक कामकाज केले जाणार आहे. शेतकऱ्यांची अॅग्रीस्टीक नोंदणी करणे, आधार कार्ड नोंदणी व अद्ययावतीकरण करणे, दुरुस्त करणे, लक्ष्मी मुक्ती योजनेअंतर्गत सातबारा पत्रकी धर्मपत्नीचे नाव सहहिस्सेदार म्हणून नोंद करणे, सलोखा योजनेअंतर्गत जमीन अदला बदलीचे व्यवहारास परवानगी देणे इत्यादी कामकाज करून संबधित लाभार्थ्यांना लाभ अथवा फेरफार, सातबारा उतारे वाटप करण्यात येणार आहेत. तालुका कृषी अधिकारी कार्यालयाकडील विविध योजनांची माहिती व लाभार्थी यांना लाभ वाटप कार्यक्रम, राज्य परिवहन महामंडळाकडील योजनांची माहिती व शालेय विद्यार्थिनींना आहिल्यादेवी होळकर योजनेअंतर्गत मोफत एस.टी. प्रवास योजनेचे पास वितरण, महावितरणकडून सोलर रुपटॉप योजना, मागेल त्याला सौर कृषिपंप योजनांचा लाभ देण्यात येणार आहे. कागल तालुक्यातील नागरिकांनी याचा लाभ घ्यावा, असे आवाहन तहसीलदार वाकडे यांनी केले आहे.