‘नीट पेपरफुटीप्रकरणी कठोर कारवाई करावी’
कागल : नीट पेपरफुटी प्रकरणाची उच्चस्तरीय चौकशी करून संपूर्ण रॅकेट उघडकीस आणावे आणि दोषींवर कठोर कारवाई करावी, अशी मागणी कागल एज्युकेशन सोसायटीचे सचिव प्रताप उर्फ भैय्या माने यांनी केली आहे. दोषींवर कारवाई झाली नाही तर राष्ट्रवादी काँग्रेस (अजित पवार) पक्षाच्या विद्यार्थी आघाडीतर्फे तीव्र आंदोलन करू, असा इशाराही त्यांनी पत्रकाद्वारे दिला आहे. नीट पेपरफुटीचा प्रकार गंभीर असून तो लाखो विद्यार्थ्यांच्या भविष्याशी संबंधित आहे. विद्यार्थी आणि पालक वर्षभर कठोर मेहनत घेऊन या परीक्षेची तयारी करतात. अनेक विद्यार्थी चांगल्या शिक्षणासाठी महागडे क्लासेस लावतात व मोठ्या अपेक्षेने परीक्षा देतात. अशा परिस्थितीत पेपरफुटीसारख्या प्रकारामुळे विद्यार्थ्यांचे मानसिक तसेच आर्थिक नुकसान होत असल्याचे श्री माने यांनी नमूद केले.