07567

झाडांचा अभाव उन्हाचा प्रभाव
रस्ते तापले ः पाचगाव, कंदलगाव, मोरेवाडीत झाडांची संख्या कमी

कंदलगाव, ता. ४ : शहराला लागून असणाऱ्या पाचगाव, मोरेवाडीसह कंदलगाव या उपनगरांतील रस्त्यावर पूर्वी मोठ्या प्रमाणावर झाडे होती. रस्ता रुंदीकरण, केबल, पाईपलाईन खोदाईसह बाजूपट्टया विकासकामांत अनेकदा अडथळा ठरत असल्याने रस्त्यावरील झाडे तोडली. त्यामुळे या भागात रस्त्यावर उन्हाचा ताव जाणवत आहे.
शासकीय नियमानुसार एक झाड तोडल्यावर त्या बदल्यात पाच झाडे लावण्याचा नियम आहे. मात्र, या नियमाचे अनेक वर्षांपासून उल्लंघन होत असल्याने जिल्ह्यातील सर्रास मुख्य रस्त्यावरील सावली नष्ट झाल्याचे दिसत आहे. पाचगाव, मोरेवाडी व कंदलगाव उपनगरांतील गावांची स्थितीही अशीच आहे. पूर्वी रस्त्याच्या दुतर्फावर झाडांचे साम्राज्य होते. अलीकडे विकासकामांच्या धडाक्याने रस्ता रुंदीकरण, केबल व पाईपलाईन खोदाईसह बाजूपट्टया वाढविणे, या कामांमुळे अनेक ठिकाणी झाडे तोडली. मात्र ती लावण्याकडे दुर्लक्ष झाल्याने झाडांच्या कमतरतेने रस्ते उन्हाने तापत असल्याचे चित्र आहे. भौगोलिकदृष्ट्या उपनगरांचा विचार करता दहा वर्षांत मोठ्या प्रमाणावर लोकवस्ती वाढल्याने नवीन कॉलनीत रस्त्यासाठी जेमतेम जागा सोडल्याने रस्ता करणे, गटारी व इतर कारणांचाही यावर परिणाम होत आहे. कॉलन्या विकसित होताना झाडांचा अडसर होत असल्याने ती तोडली जातात.

चौकट.

वृक्षारोपणाकडे दुर्लक्ष
पाचगाव ते गिरगाव रस्त्यावर दीड वर्षापूर्वी सामाजिक वनीकरण विभागाने वृक्षारोपण केले होते. मात्र वृक्षारोपणाकडे दुर्लक्ष झाल्याने त्याठिकाणी फक्त आधाराची काठीच राहिली आहे.

कोट.
07570
पाचगावपासून गिरगावपर्यंतच्या रस्त्यावर पूर्वी मोठ्या प्रमाणावर झाडे होती. रस्ता रुंदीकरणात झाडे तोडली गेली. दहा वर्षांपासून रस्त्यावर एकही झाडे लावलेले नाही. त्यामुळे गावकऱ्यांना दुपारी उन्हाचे चटके सोसत प्रवास करावा लागतो.
- संभाजी साळोखे, गिरगाव.

07569
कंदलगाव मुख्य रस्त्यावर सहा-सात वर्षांपूर्वी झाडे लावली. मात्र देखभाल व विकासकामांच्या खोदाईने झाडांची मोडतोड होऊन ती नष्ट झाली. पुन्हा वृक्षारोपण झाले नाही. रस्त्यावर झाडे नसल्याने विद्यार्थी व वाहनधारकांना उन्हातून प्रवास करावा लागतो.
- अमर किल्लेदार, कंदलगाव