10065

पालापाचोळ्याचे मल्चिंग
करून रोपट्यांचे संगोपन

वृक्षमित्रांचा दैनंदिन उपक्रम

कंदलगाव, ता. ६ : शहर व परिसरात पाच वर्षांपासून रिकाम्या जागेत वृक्षारोपण करून त्यांचे संगोपन करणाऱ्या संस्था व वृक्ष मित्रांची संख्या सध्या मोठ्या प्रमाणावर वाढत आहे. या संस्था व वृक्ष मित्रांकडून दैनंदिन वेळेतील काही तास लावलेल्या वनीकरणात घालवून संवर्धनाची सेवा सुरू आहे.
सुनील पाच्छापुरे, प्रा. प्रफुल्ल खेडकर व मन्सूर गोवावाला या तिघांनी वृक्षारोपण संगोपनासाठी शहरातील टाकाळा भागातून पालापाचोळा गोळा करून तो त्यांनी लावलेल्या रोपट्यांचे उन्हापासून संरक्षण म्हणून मल्चिंग करण्यासाठी वापरतात. हा उपक्रम दोन-तीन वर्षापासून सुरू असून यावर्षीही या उपक्रमाची सुरुवात झाली आहे.
जनजागृतीतून आवाहनही
माळावरील वृक्षारोपणातील रोपांना मल्चिंग करण्यासाठी पालापाचोळ्याची गरज असते. हा पालापाचोळा शहर परिसरातून मोठ्या प्रमाणावर मिळतो. त्यासाठी सोशल मीडियाचा वापर करून त्याद्वारे जनजागृती करण्यात येते. जनजागृतीतून नागरिकांना त्यांच्या अंगणातील पालापाचोळा एकत्र करण्यासाठी आवाहन केले जाते. गोळा झालेला पालापाचोळा रिक्षातून किंवा दुचाकीवर घेऊन तो झाडांच्या बुंध्यांशी घातला जातो.

कोट
सध्या उन्हाळ्याचे दिवस असून माळावरील रोपट्यांना पाण्याची कमतरता भासत आहे. ही कमतरता भरून काढण्यासाठी रोपांच्या बुंध्यापाशी पालापाचोळ्याचे मल्चिंग केले जाते. त्यातून बऱ्यापैकी पाण्याची बचतही होते. रोपांना असलेली पाण्याची गरजही भागते.
- प्रा. प्रफुल्ल खेडकर,वृक्षमित्र.