कोडोलीत हिसडा मारून
मंगळसूत्र पळविले
कोडोली : रायगड कॉलनी, सुतारकी कोडोली (ता. पन्हाळा) येथे रात्रीच्या जेवणानंतर शतपावली करत असताना सुनंदा अशोक पाटील यांच्या गळ्यातील सव्वा तोळ्याचे सोन्याचे मनी मंगळसूत्र मोटरसायकलवरून आलेल्या दोघांनी हिसडा मारून पळवून नेले. या घटनेची नोंद कोडोली पोलिस ठाण्यात झाली आहे.
याबाबतची अधिक माहिती अशी, रविवारी (ता. १२) रात्री १०.१५ च्या सुमारास रात्रीच्या जेवणानंतर सुनंदा पाटील व त्यांचे शेजारी वंदना पाटील कॉलनीतील मुख्य रोडवर शतपावली करीत होत्या. यावेळी समोरून मोटारसायकलवरून तोंडाला स्कार्फ बांधून आलेल्या अज्ञातांपैकी पाठीमागे बसलेल्या चोरट्याने सुनंदा यांच्या गळ्यातील सव्वा तोळ्याचे सुमारे ९० हजार रुपये किमतीचे सोन्याचे मनी मंगळसूत्र हिसडा मारून धूम स्टाईलने पोबारा केला.