04546
म्हसवेत : येथे पाऊस न झाल्याने टँकरद्वारे पाणी पाजून उगवण करण्यात शेतकरी गुंतला आहे. (अरविंद सुतार : सकाळ छायाचित्रसेवा)

भात रोपांना टॅंकरद्वारे पाणी
कोनवडे परिसर; पिके जगविण्यासाठी धडपड
कोनवडे, ता. १६ : पावसाने ओढ दिल्याने यंदा मृग नक्षत्रासह रोहिणी नक्षत्रही कोरडे गेले. मृग नक्षत्र सुरू असूनही पाऊस न झाल्याने बळीराजा चिंतेत आहे. पेरलेले भातपीक वाया जाऊ नये व उगवण झालेल्या सुकत चाललेली रोपे जगवण्यासाठी टँकरने विकत पाणी घेऊन रोप जगवण्यात शेतकऱ्यांची धडपड सुरू आहे. भात पेरणीस महिना ओलांडला तरीही पाऊस न झाल्याने दुबार पेरणीचे संकट शेतकऱ्यांसमोर आहे.
कूर, दारवाड, महालवाडीसह भुदरगड तालुक्यात रोहिणी नक्षत्राच्या मुहूर्तावर पेरणी करतो. पण पेरणी करून सव्वा महिना उलटला तरी उगवण न झाल्याने भात पीक वाया जाऊ नये यासाठी धडपडत आहे. नदी, विहीर, कालवा, टँकर यांच्या साहाय्याने भात पिकास पाणी देत आहे. वेदगंगा नदी कोरडी पडल्याने पिण्याच्या पाण्याचेही संकट उभे ठाकले आहे. माळरानावर पेरणी केली; पण उगवण न झाल्याने दुबार पेरणीचे संकट समोर आहे.
हेदवडे, गिरगाव, फये, देवकेवाडी, मोरस्करवाडी, आप्पाचीवाडी, पंडिवरे, मिणचे बुद्रुक, कोळवण, बोंगार्डेवाडी, भाटीवडेसह परिसरातील शेतकरी भातरोप लागण करतो. पण यंदा मृग नक्षत्रावर पाऊसच न झाल्याने शेतीची कामे ठप्प झाली आहेत. उगवण झालेली रोपे पावसाअभावी सुकू लागल्याने कोमेजणाऱ्या पिकांची माना टाकलेल्या पाहून शेतकऱ्यांचा जीव कासावीस होत आहे. शेतकरी भात पिकांचे तरवे जगवण्यासाठी टँकरने पाणी देत आहे.
---
कोट :
पेरणी करून महिना उलटला तरी पाऊस न झाल्याने धूळवाफ पेरणीतील भात बियाणे खराब झाले आहेत. आता दुबार पेरणीशिवाय पर्याय नाही.
- राघव मोरे, शेतकरी, दारवाड