पापड करण्यासाठी गृहिणींची लगबग

कोनवडे, ता. १० : पावसाळ्यात रोजच्या आहारात लागणारे विविध पदार्थ महिला उन्हाळ्यात करून ठेवले जातात. पावसाळा जवळ येऊ लागल्याने पावसाळ्यात जेवणात लागणाऱ्या पापड, पापड्या, कुरडया, सांडगे आदी पदार्थ करण्यात ग्रामीण भागातील महिला गुंतल्या आहेत. त्यामुळे मिरची, डाळी, तांदूळ यांची मागणी वाढली आहे.
पावसाळा सुरू झाला की बाजारात फळभाज्या आणि पालेभाज्यांची आवक मंदावते, त्यामुळे रोजच्या स्वयंपाकात काय भाज्या करायच्या, हा प्रत्येक गृहिणींसमोर प्रश्न असतो. त्यामुळे या काळात पूर्वापार चालत आलेल्या पदार्थांना मागणी वाढते. त्यामुळे हे पदार्थ कडक उन्हाळ्यात तयार करून साठवून ठेवण्यात गृहिणी दंग आहेत. शहरी भागात विविध ठिकाणांहून भाजांची आवक होते. पण ग्रामीण भागात पावसाळ्यात या पदार्थांची रेलचेल असते. धो धो पावसात शेतात किंवा घरात या पदार्थांची चव जेवणाची लज्जत वाढवते. सध्या उन्हाचा कडाका वाढला आहे. तापमान ४० डिग्रीपर्यंत पोहोचले आहे. अशा तापमानात हे पदार्थ करून वाळवून ठेवले जात आहेत. यामुळे याचा वर्षभरासाठी उपयोग होतो.