6313
दारवाड (ता. भुदरगड) ः येथे भात कापणीच्या कामाला गती आली असून, शेतशिवारे गजबजली आहेत.
..................
भुदरगड तालुक्यात
भात कापणीला गती

पाऊस थांबल्याने शेतशिवारे गजबजली

सकाळ वृत्तसेवा
कोनवडे, ता. ३१ : भुदरगड तालुक्यात परतीचा पाऊस थांबल्याने भात कापणीच्या कामाला वेग आला आहे. गेल्या १५ दिवसांत परतीच्या पावसाने तालुक्यात धुमाकूळ घातल्याने भात कापणीची कामे खोळंबली होती. त्यामुळे शेतकरी चिंताग्रस्त झाला होता. सध्या पाऊस थांबल्याने भात कापणीच्या कामाला वेग आला असून, शेतशिवरे गजबजली आहेत.
अनेक ठिकाणी शेतातच भात पीक भुईसपाट झाल्याने शेतकऱ्यांचे मोठे नुकसान झाले. काही ठिकाणी तर शेतातच झोडणी केलेल्या भाताचे पिंजर पावसात भिजल्याने कुजून शेतकऱ्यांचे मोठे नुकसान झाले. तालुक्यात अनेक ठिकाणी शेतातच लाकडी खाटले घेवून भात झोडणी सुरू आहे. तर काळवट जमिनीत ओल असल्याने रस्त्यावर भात झोडणी करताना दिसत आहेत तर काही भागात रस्त्यावरच शेतकरी मळणी करत असल्याचे चित्र पाहावयास मिळत आहे.
सध्या मजुरांची टंचाई जाणवत असल्याने पैरा पद्धतीने भात कापणी करून घेण्यात शेतकरी मग्न आहेत. दिवाळी सण सुरू असला तरी शेतकरी सध्या भात कापणीत गुंतल्याचे चित्र पाहावयास मिळत आहे. परतीच्या पावसाचा मोठा धसका घेतल्याने भात कापणीच्या कामाला तालुक्यात वेग आला आहे.
............
चौकट :
मागील आठवडाभर पावसाने पिकांचे मोठे नुकसान केले. भात, भुईमूग पीक काही ठिकाणी वाया गेले. कापणी केलेले पीक वाळविण्याचा प्रश्न निर्माण झाला आहे. त्यामुळे शेतकऱ्यांना चाराटंचाईस सामोरे जावे लागणार आहे.
सुरेश पाटील, शेतकरी बसरेवाडी
....