अधिकाऱ्यांअभावी
कामकाज थंडावले

कोल्हापूर, ता. ८ ः राज्य माहिती आयुक्तांकडे असलेल्या अपिलासाठी आज अधिकारी, अन्य कर्मचारी पुण्याला गेल्याने महापालिकेतील कामकाज थंडावल्याचे दिसत होते. विभागीय कार्यालयात ‘साहेब नाहीत’ हे ऐकून नागरिक परत जात होते. मुख्य इमारतीतील चौकाचा आवारही वाहनांअभावी रिकामा होता.
आरोग्य, पवडी, विभागीय कार्यालये, नगररचना विभागाकडील बहुतांश अपिल माहिती आयुक्तांकडे होते. त्यासाठी संबंधित विभागातील माहिती अधिकारी, अपिलीय अधिकारी तसेच सहाय्यक कर्मचारी कालपासूनच पुण्याला रवाना झाले. काही विभागातील अधिकारी एकत्र वाहनाने गेले तर त्यांचे सहाय्यक वेगवेगळ्या माध्यमातून पुण्याला गेले. आजही काही रवाना झाले. त्यामुळे महापालिकेच्या चौकात अनेक अधिकाऱ्यांची वाहने आली नाहीत. त्यामुळे चौकाचा आवार रिकामा वाटत होता. प्रशासकही बैठकांसाठी अन्य कार्यालयात गेल्या होत्या. अपिलासाठी विविध विभागांचे प्रमुख गेले असल्याने त्या विभागातील अन्य कर्मचारीही जागेवर दिसत नव्हते. मुख्य इमारत सोडून इतर ठिकाणी असलेल्या कार्यालयात तर शांतता जाणवत होती.