विमानतळ विस्तारीकरणाची कामे
ऑक्टोबरअखेर पूर्ण करणार ः शिंदे

उजळाईवाडी, ता. २३ ः कोल्हापूर विमानतळ विकास आणि विस्तारीकरणाची सध्या एकूण २८० कोटींची कामे सुरू आहेत. ही सर्व कामे ऑक्टोबरअखेर पूर्ण करण्यात येतील. कोल्हापुरातून देशातील इतर नव्या शहरांमध्ये विमानसेवा सुरू केली जाईल, अशी ग्वाही केंद्रीय नागरी विमान वाहतूक मंत्री ज्योतिरादित्य शिंदे यांनी आज येथे दिली.
कोल्हापूर आणि हातकणंगले लोकसभा मतदारसंघातील दोन दिवसांच्या दौऱ्यासाठी सकाळी दहा वाजून ३७ मिनिटांनी केंद्रीय मंत्री शिंदे यांचे कोल्हापूर विमानतळावर आगमन झाले. त्यावेळी त्यांनी पत्रकारांशी संवाद साधला. कोल्हापूर विमानतळावर टर्मिनल बिल्डिंग, एटीसी टॉवर, पार्किंग ॲप्रन, त्याचबरोबर धावपट्टीचे २३०० मीटर पर्यंत विस्तारीकरण आदी विकासकामे सुरू आहेत. दीड वर्षात देशातील अन्य प्रमुख शहरांना विमानसेवा सुरू करून कोल्हापूरची एअर कनेक्टिव्हिटी वाढवली आहे. भाजपचे जिल्हाध्यक्ष समरजितसिंह घाटगे, सम्राट महाडिक, राहुल आवाडे, सत्यजित देशमुख आदींनी स्वागत केले.

चौकट
तिसऱ्यांदा दौरा
दरम्यान, ‘लोकसभा प्रवास’ या भाजपच्या कार्यक्रमानुसार मंत्री शिंदे हे आता सलग तिसऱ्यांदा कोल्हापूर दौऱ्यावर आले आहेत. मागील दोन दौऱ्यात त्यांनी चंदगड आणि गडहिंग्लज तालुक्यांमध्ये सरकारने राबविलेल्या योजना, विकासकामांचा आढावा घेतला होता.