हरकत मांडली, प्रतीक्षा निर्णयाची
वाढीव हद्द विकास आराखडा; १७८ पैकी १९ हरकतदार सुनावणीला गैरहजर
सकाळ वृत्तसेवा
गडहिंग्लज, ता. १० : शहराच्या वाढीव हद्दीच्या प्रारुप विकास आराखड्यावर दाखल झालेल्या हरकतींची सुनावणी दोन दिवस झाली. १७८ पैकी १९ जणांनी या सुनावणीला गैरहजर राहिले. हरकत मांडली, आता शेतकरी, नागरिकांचे डोळे अंतिम निर्णयाकडे लागले आहेत. सभागृह अस्तित्वात नसल्याने प्रशासक तथा मुख्याधिकारी स्वरुप खारगे यांच्याकडे समिती अहवाल सादर करणार आहे.
हद्दवाढीनंतर दोन वर्षांनी विकास आराखडा तयार केला. २४ पैकी २२ आरक्षणे खासगी जागेवरच निश्‍चित केल्याने या आराखड्याबाबत शेतकरी व नागरिकांतून संताप व्यक्त झाला. परिणामी आराखड्यावर मोठ्या प्रमाणात हरकती वाढल्या. १७८ हरकती दाखल झाल्यानंतर काल (ता. ९) व आज (ता.१०) नियोजन समितीने या हरकतींची सुनावणी घेतली. नगररचना विभागाचे निवृत्त सहायक संचालक एम. टी. यादव, आर. एन. पाटील आर्किटेक्ट निशिकांत गोरुले, मुख्याधिकारी स्वरुप खारगे यांच्या समितीसमोर हरकतदारांनी म्हणणे सादर केले. ७० टक्के हरकती या खासगी जमिनीवरील आरक्षणे, रस्ता रुंदीकरण आणि जुना रस्ता असूनही नव्या रस्त्याला आक्षेप घेणाऱ्‍या आहेत. दोन दिवस झालेल्या सुनावणीचे नियोजन पालिकेचे नगररचना सहायक अंशूमन गायकवाड, बांधकाम अभियंता सुधीर पोतदार, निखील पाटील यांच्यासह कर्मचाऱ्‍यांनी केले होते.
-----------
शासनाच्या मान्यतेकडे लक्ष
दोन दिवसांत १५९ जणांचे समितीने म्हणणे ऐकून घेतले असून आता या सुनावणीचा अहवाल समिती तयार करेल. आराखड्यासंदर्भात गरज असेल त्या ठिकाणी शिफारशी सुचवून हा अहवाल प्रशासक तथा मुख्याधिकारी खारगे यांच्याकडे सादर करणार आहे. श्री. खारगे यांनी या शिफारशींचा अभ्यास करुन गरजेच्या ठिकाणी फेरबदल सुचवून हा आराखडा, समितीचा अहवाल आणि प्रशासक म्हणून आपले मत शासनाकडे पाठवतील. शासन स्तरावर या आराखड्याला अंतिम मान्यता मिळणार असून त्याकडे आता शेतकरी, नागरिकांचे डोळे लागले आहेत. मांडलेल्या हरकतींचा विचार होवून न्याय मिळण्याच्या अपेक्षेने शेतकरी अंतिम निर्णयाच्या प्रतीक्षेत आहेत.