04608

‘फुलेवाडी’चा एकतर्फी विजय 
उत्तरार्धात ‘बीजीएम’कडून प्रतिकार; मात्र गोल नोंदवण्यात अपयश

कोल्हापूर, ता. २३ : फुलेवाडी फुटबॉल क्रीडा मंडळ संघाने बीजीएम स्पोर्टस् संघावर ३ विरुद्ध ० गोल फरकाने विजय मिळवत पुढील फेरीत प्रवेश केला. तटाकडील तालीम मंडळ आयोजित अटल चषक फुटबॉल स्पर्धेचा हा सामना छत्रपती शाहू स्टेडियमवर झाला.  
फुलेवाडी विरुद्ध बीजीएम यांच्यातील सामना एकतर्फी ठरला. आक्रमक खेळणाऱ्या फुलेवाडी संघाने सामन्यावर वर्चस्व राखले. आक्रमक चाली रचत बीजीएम संघाच्या मध्यफळी व बचाव फळीवर दबाव आणत आक्रमण करत गोल नोंदवण्याचा प्रयत्न केला. सामन्याच्या २७ व्या मिनिटाला फुलेवाडीच्या विराज साळोखे याने गोल नोंदवत संघाला १ - ० अशी आघाडी मिळवून दिली. उत्तरार्धात बीजीएम संघाकडून प्रतिकार झाला. यात चांगल्या चाली रचत फुलेवाडी संघाची बचाव फळी भेदत गोलसाठी झालेले प्रयत्न फोल ठरले.
दरम्यान संकेत जरगच्या पासवर कपिल शिंदे याने हेड द्वारे मारलेला फटका गोलजाळी बाहेरून गेला, तर अनेक फटके फुलेवाडीचा गोलरक्षक रणवीर खालकर याने फोल ठरवले. सामन्याच्या ८० व्या मिनिटाला फुलेवाडीच्या चंदन गवळी याने गोलाची नोंद करत सामना २-० असा केला तर पाठोपाठ अधिकच्या वेळेत चंदन गवळी यानेच वैयक्तिक दुसऱ्या व संघासाठी तिसऱ्या गोलची नोंद करत सामना ३-० असा केला. 

चौकट
उत्कृष्ट असे
सामनावीरःचंदन गवळी : फुलेवाडी 
लढवय्या ःअभिजित साळोखे : बीजीएम 

चौकट
आजचा सामना 
सायंकाळी ४ ः दिलबहार तालीम मंडळ विरुद्ध उत्तरेश्वर प्रासादिक वाघाची तालीम