06365

नकुशा मदने खून प्रकरणातील
संशयित आरोपींना अटक करा

‘मंगळवेढा शिवसेना’चे आयजी कार्यालयासमोर धरणे

सकाळ वृत्तसेवा
कोल्हापूर, ता. १ ः पडोळकरवाडी (ता. मंगळवेढा) येथील नकुशा मदने खून प्रकरणातील संशयित आरोपी १४ महिने झाले तरीही मोकाट आहेत. त्यांना अटक करा, पोलिस निरीक्षक रणजित माने यांना निलंबित करा, यासह अन्य मागण्यांसाठी विशेष पोलिस महानिरीक्षक कार्यालयासमोर बेमुदत धरणे आंदोलन आजपासून सुरू झाले. मंगळवेढा शिवसेना शहर समन्वयक नारायण गोवे यांच्यासह इतर पदाधिकाऱ्यांनी हे आंदोलन सुरू केले आहे.
संत दामाजीनगर येथील चार वर्षांच्या बालकाचे अपहरण होऊन सहा महिने झाले तरीही त्याचा शोध लागलेला नाही. तालुक्यातील घरफोड्यांचे प्रमाण वाढले असूनही तपास होत नाही. खोट्या गुन्ह्याचा फेरतपास व्हावा, यासह इतर मागण्यांसाठी धरणे आंदोलन सुरू झाल्याचे त्यांच्या निवेदनात म्हटले आहे. जोपर्यंत निरीक्षक माने यांचे निलंबन होत नाही, तोपर्यंत धरणे आंदोलन सुरूच ठेवणार असल्याचे पदाधिकाऱ्यांनी सांगितले. शिवसेना समन्वयक नारायण गोवे, प्रहार तालुकाध्यक्ष राजकुमार स्वामी, राहुल हेंबाडे, अमोगसिद्ध काकणकी, अशोक शिवहारण, प्रतीक किल्लेदार, चंद्रशेथक कोंडभैरी, दामाजी मेटकरी यांच्यासह इतरांचा आंदोलनात सहभाग असल्याचे पदाधिकाऱ्यांनी सांगितले.