सीपीआर रुग्णालयात नेत्रदान पंधरवडा
कोल्हापूर , ता. १४ ः ‘‘नेत्रदानही काळाची गरज आहे जास्तीजास्त लोकांनी नेत्रदान केल्यास अनेक अंधव्यक्तींना त्यांची दृष्टी परत मिळवून देता येणे शक्य होईल. त्यामुळे नेत्रदानातून अंध व्यक्तींच्या जगण्याला नवी उभारी मिळू शकेल, असे मत शासकीय वैद्यकीय महाविद्यालयाचे प्रभारी अधिष्‍ठाता डॉ. आरती घोरपडे यांनी केले.
सीपीआर रुग्णालयात नेत्ररोगतज्‍ज्ञ डॉ. आर. ए. भालचंद्र यांच्या स्मृतिदिन साजरा करण्यात आला. या वेळी त्या बोलत होत्या. नेत्रदान विषयी जनजागृती करण्याचा भाग म्हणून नेत्रदान पंधरवडाही साजरा करण्यात आला. यात नेत्रदानाविषयी महत्त्‍व सांगण्याबरोबर, नेत्रदानाविषयी असलेले गैरसमज दूर करण्यासाठी नेत्ररोग तज्‍ज्ञांनी मार्गदर्शन केले.
जिल्ह्यातील ग्रामीण भागातील लोकांमध्येही नेत्रदान विषयी जागृती करण्यात येत आहे. यातून नेत्रदानाला ग्रामीण भागातही प्रतिसाद वाढेल असा, आशावाद जिल्हा शल्यचिकित्सक डॉ. सुनील देशमुख यांनी व्यक्त केला. नेत्रविभाग प्रमुख डॉ. अतुल राऊत यांनी गेल्या वर्षभरात सीपीआरसह विविध ठिकाणी झालेल्या नेत्रदान उपक्रमाची माहिती दिली. नेत्रविभाग प्रमुख डॉ. सुजाता वैराट, डॉ. अभिजित ढवळे, डॉ. प्राजक्ता पाटील, समुपदेशक जॉन लोखंडे यांनी या उपक्रमात सहभाग घेतला.