जरग विद्यामंदिरमध्ये विद्यार्थ्यांची उपस्थिती वाढली
कोल्हापूर ः जरगनगर येथील लक्ष्मीबाई जरग विद्यामंदिरमधील वर्ग खोल्यांची अडचण लक्षात घेऊन शाळेने केलेल्या आवाहनाला पालकांनी प्रतिसाद दिला. दुसऱ्या दिवशी विद्यार्थी संख्येत वाढ झाल्याचे पत्रक केंद्रमुख्याध्यापकांनी दिले आहे. पत्रकात म्हटले आहे, वर्गखोल्या कमी असल्याने ती लक्षात घेऊन पालकांनी सहकार्य करावे, असे आवाहन केले होते. पहिल्या दिवशी पालकांनी चांगला प्रतिसाद दिला. दुसरीचे २४५ विद्यार्थी सकाळच्या सत्रात आले होते. दुसऱ्या दिवशी वाढ होऊन २९९ विद्यार्थी शाळेत उपस्थित राहिले. अनुपस्थित विद्यार्थ्यांपैकी बहुतांश विद्यार्थी परगावी गेले आहेत. तेही सोमवारपर्यंत येतील, असे पालकांनी सांगितले आहे. वर्ग खोल्या उपलब्ध होतील, तसे वर्ग दिवसभरासाठी भरवले जातील. त्यामुळे पालकांनी सहकार्य करावे.