19009
गडहिंग्लज : शिवराजमध्ये भरड धान्याचे पदार्थ विक्री केंद्राच्या उद्‍घाटनप्रसंगी डॉ. अनिल कुराडे, डॉ. एस. एम. कदम, बिनादेवी कुराडे, पौर्णिमा कुराडे आदी उपस्थित होते.

भरड धान्याच्या पदार्थांचे
‘शिवराज’मध्ये विक्री केंद्र
सकाळ वृत्तसेवा
गडहिंग्लज, ता. २६ : येथील शिवराज महाविद्यालयात पौष्टीक भरड धान्यापासून तयार होणाऱ्या पदार्थांसह पर्यावरण संवर्धनासाठी प्लास्टिक मुक्ती जनजागृती करण्यात आली. त्यासंदर्भातच्या विक्री केंद्राचे उद्‍घाटन ‘शिवराज’चे सचिव डॉ. अनिल कुराडे व प्रा. बिनादेवी कुराडे यांच्या हस्ते झाले. प्राचार्य डॉ. एस. एम. कदम अध्यक्षस्थानी होते.
डॉ. श्रद्धा पाटील यांनी सेल काउंटरबाबतचा हेतू स्पष्ट केला. विद्यार्थ्यांमध्ये पुस्तकी ज्ञानाबरोबरच कला व व्यवहार गुणांचा विकास व्हावा यासाठी हा उपक्रम राबवित असल्याचे त्यांनी सांगितले. भरड धान्यापासून तयार केलेले पदार्थ आणि विद्यार्थ्यांमध्ये प्लास्टिक मुक्तीबाबत जनजागृती व्हावी यासाठी पर्यावरणपूरक वस्तू वापराव्यात, असे आवाहन डॉ. कदम यांनी केले. त्यासाठी कापडी पिशव्या बनविण्याच्या स्पर्धा घेण्यात आल्या. या पिशव्या महाविद्यालयात वितरीत केल्या. पिण्याच्या पाण्यासाठी प्लास्टिक ऐवजी स्टील बॉटल वापरण्याचे आवाहनही केले. या उपक्रमाची जनजागृती समाजात व्हावी यासाठी महाविद्यालय व्यवस्थापन, प्राध्यापक, प्रशासकीय सेवक, विद्यार्थी, माजी विद्यार्थी, पालक यांच्या सहभागाने हा उपक्रम राबविला जात असल्याचे सांगितले. या विक्री केंद्रात भरड धान्यापासूनचे पौष्टिक अन्नपदार्थ, कापडी पिशव्या, स्टेशनरी, पुस्तके, स्टील बॉटल, विद्यार्थ्यांनी तयार केलेल्या पर्यावरणपूरक वस्तू, विविध झाडांची रोपे आदींचा समावेश आहे.
कार्यक्रमास प्राध्यापक, कर्मचारी, विद्यार्थी-विद्यार्थिनी उपस्थित होते. प्रा. पौर्णिमा कुराडे, डॉ. श्रद्धा पाटील, प्रा. नीळकंठ भोसले, डॉ. प्रवीण डोंगरे यांनी उपक्रमाचे संयोजन केले. सहसमन्वयक प्रा. पौर्णिमा कुराडे यांनी स्वागत केले. प्रा. साहिल समडोळे यांनी आभार मानले.