आयडियल आर्यन्स ग्रुपतर्फे
उद्या शॉर्ट फिल्म स्पर्धा

कोल्हापूर ः आयडियल आर्यन्स कल्चरल ग्रुपच्या १८ व्या वर्धापन दिनानिमित्त शॉर्ट फिल्म स्पर्धेचे आयोजन केले आहे. तसेच विविध क्षेत्रांत उल्लेखनीय काम करणाऱ्या व्यक्तींना या सोहळ्यात गौरविण्यात येणार आहे. शुक्रवारी (ता. २८) दुपारी एक वाजता राजर्षी शाहू स्मारक भवनात कार्यक्रम होईल. सायंकाळी सात वाजता येथेच सत्कार सोहळा होईल. शरद कला व क्रीडा प्रतिष्ठान व आयडियल आर्यन्स कल्चरल ग्रुप यांच्यातर्फे हा कार्यक्रम होईल.
ग्रुपतर्फे हर्षल सुर्वे (गडकोट संवर्धन), राजुल लाईन्सवाला (विक्रमी रक्तदान), आकाश कोरगावकर (आयर्न मॅन), दत्तात्रय पोवार (वृक्षप्रेमी), ऋषिकेश परीट (वृक्षप्रेमी), अरुण शिंदे (ज्येष्ठ स्पॉट बॉय) यांच्यासोबत इम्तियाज बारगीर, मिलिंद अष्टेकर, सुनील मुसळे व सुगुन नाट्यसंस्था यांना गौरविण्यात येईल. तसेच आगामी पाच चित्रपटाच्या संघालाही यावेळी सन्मानित केले जाणार असून यामध्ये उमेश बगाडे (सिनेमन), संजय तोडकर (वहिवाट), अनुप जत्राटकर (गाभ), सुनील चौगुले (गाव लय शहाणं) आणि मकरंद लिंगनूर (शिवायन) या चित्रपटांचा समावेश आहे, अशी माहिती ग्रुपचे पांडुरंग गजगेश्वर यांनी पत्रकार परिषदेत दिली. अजय खाडे, मकरंद लिंगनूरकर, सुरेखा पाखरे, प्रसाद देशपांडे उपस्थित होते.