20271
...

दुचाकी, मोबाईल चोरणाऱ्या
सराईत चोरट्यास अटक

कोल्हापूर, ता. ३१ ः मध्यवर्ती बसस्थानक, शाहूपुरी या परिसरातून दुचाकी, मोबाईल चोरणाऱ्या सराईत गुन्हेगाराला आज शाहूपुरी पोलिसांनी अटक केली. त्याच्याकडून चोरीची दुचाकी, मोबईल असा सुमारे ३५ हजारांचा मुद्देमाल जप्त करण्यात आला. विजय सतीश कांबळे (रा. पुलाची शिरोली, ता. हातकणंगले) असे त्याचे नाव आहे.
पोलिसांनी दिलेल्या माहितीनुसार, मध्यवर्ती बसस्थानक परिसरातून शनिवारी (ता. २९) एका महाविद्यालयीन युवतीचा मोबाईल चोरीला गेला. याबाबतची फिर्याद तिने शाहूपुरी पोलिस ठाण्यात दिली. त्यानंतर पोलिसांनी या परिसरातील चोऱ्यांच्या गुन्ह्यातील संशयितांची माहिती घेतली. यावेळी त्यांना चोरीचे मोबाईल विकणारा एकजण सासने ग्राउंड परिसरात संध्याकाळी येणार असल्याची माहिती मिळाली. पोलिसांनी या परिसरात सापळा रचला. त्यावेळी दुचाकीवरून एक व्यक्ती येथे आल्याचे त्यांच्या निदर्शनास आले. या व्यक्तीचा वावर संशयास्पद वाटल्याने त्यांनी त्याला ताब्यात घेतले. प्राथमिक चौकशी केल्यानंतर ती व्यक्ती म्हणजे सराईत गुन्हेगार विजय कांबळे असल्याचे लक्षात आले. त्याच्याकडे कसून चौकशी केली असता त्याच्या ताब्यातील दुचाकी ही काही दिवसांपूर्वी शाहूपुरी २ री गल्ली येथून चोरल्याचे त्याने कबूल केले. तसेच त्याच्याकडील मोबाईलही चोरीचा असल्याचे त्याने सांगितले. ही कारवाई पोलिस निरीक्षक अजयकुमार सिंदकर यांच्या नेतृत्वाखाली प्रमोद चव्हाण, संदीप जाधव, मिलिंद बांगर, लखन पाटील, शुभम संकपाळ, बाबा ठाकणे, विकास चौगले, रवी आंबेकर, अमर सायेकर यांनी केली.