सांस्कृतिक भवनासाठी निधीची मागणी
इचलकरंजी : वाल्मीकी म्हेतर सांस्कृतिक भवनाच्या दुरुस्तीसह व्यायाम शाळेसाठी ५० लाखांचा निधी जिल्हा नियोजन समितीतून मंजूर करून द्यावा, या मागणीचे निवेदन माजी उपनगराध्यक्ष रवी रजपूते यांनी शिवसेना जिल्हाध्यक्ष रवींद्र माने यांना दिले. निवेदनात म्हेतर समाजासाठी तीस वर्षांपूर्वी समाज मंदिर तथा सांस्कृतिक भवन बांधले आहे. त्याच्या वरील मजल्यावर व्यायामशाळा आहे. त्यामुळे येथे सुरू असलेल्या अंगणवाडीस जागा अपुरी पडत आहे. इमारतीचा आणखी एक मजला वाढवावा. व्यायामाचे आधुनिक साहित्य मिळावे. भवनाची दुरुस्ती केली जावी. यासाठी ५० लाखांचा निधी मंजूर करावा, असे नमूद केले आहे. तानाजी अनंतपुरे, नरेश सावंत, धनराज पाल, विजय चव्हाण, राजू भंडारी, अंबादास गदवाळकर, रमेश रजपूत उपस्थित होते.
-------------
इचलकरंजी व्यापारी सहकारी पतसंस्था वार्षिक सभा
इचलकरंजी : इचलकरंजी व्यापारी सहकारी पतसंस्थेची वार्षिक सर्वसाधारण सभा संत नामदेव भवन येथे झाली. अहवाल सालात दिवंगत सभासद व मान्यवर व्यक्तींना श्रद्धांजली वाहिली. संस्थेचे अधिकृत भागभांडवल ६९ लाख १५ हजार असून एकूण निधी ४ कोटी २८ लाख, ठेवी १५ कोटी ३२ लाख, येणे कर्ज ११ कोटी ४१ लाख, गुंतवणुक १० कोटी १५ लाख, खेळते भांडवल २३ कोटी ६५ लाख असून संस्थेला अहवाल वर्षात उत्पन्न २ कोटी २० लाख झाले आहे. निव्वळ नफा ६० लाख ५८ हजार इतका झाला आहे. नफ्यातील सातत्यामुळे या वर्षी देखील सभासदांना १५ टक्के लाभांश देऊन १० वर्षांची परंपरा कायम राखली असल्याचे संस्थेचे चेअरमन सूर्यकांत साखरे यांनी संगितले. या वेळी आमदार प्रकाश आवाडे, राजगोंडा पाटील, गजानन लोंढे, विलास गाताडे, बाळासाहेब बरगाले यांच्यासह सर्व संचालक, सेवकवर्ग उपस्थित होते.