कोल्हापूर लोकसभा मतदारसंघातील
ग्रामीण भागासाठी १० कोटींचा निधी

खासदार संजय मंडलिक यांची माहिती

कोल्हापूर, ता. १८ ः कोल्हापूर लोकसभा मतदारसंघातील ग्रामीण भागाच्या विकासासाठी ग्रामविकास व पंचायतराज विभागाच्या योजनेअंतर्गत २०२३ - २४ या आर्थिक वर्षासाठी १० कोटी रूपयांचा निधी मंजूर झाला आहे. मतदारसंघातील ९ तालुक्यांतील ११७ गावांसाठी हा निधी मंजूर झाल्याची माहिती खासदार संजय मंडलिक यांनी प्रसिद्धी पत्रकाव्दारे दिली आहे.
पत्रकात म्हटले आहे, मंजूर कामांमध्ये व्यायामशाळा, सभागृह, रस्ते, गटर्स, गार्डन विकसित करणे, पेव्हींग ब्लॉक, नदीघाट, हायमास्ट दिवे यांचा समावेश आहे. कागल तालुक्यातील ८ गावांसाठी ७४ लाख, करवीर तालुक्यातील १४ गावांसाठी ३२ लाख, पन्हाळा तालुक्यातील २० गावांसाठी १ कोटी ५५ लाख, गगनबावडा तालुक्यातील १२ गावांसाठी ९३ लाख, गडहिंग्लज तालुक्यातील ९ गावांसाठी ८१ लाख, आजरा तालुक्यातील १४ गावांसाठी १ कोटी २२ लाख, चंदगड तालुक्यातील ५ गावांसाठी ४४ लाख, राधानगरी तालुक्यातील २० गावांसाठी १ कोटी ६८ लाख रूपये तर भुदरगड तालुक्यातील १५ गावांसाठी १ कोटी ३२ लाख रूपयांचा निधी उपलब्ध होणार आहे. टेंडर प्रक्रिया पूर्ण होऊन पावसाळ्यानंतर कामांना सुरूवात होईल. यामुळे मतदारसंघातील दुर्गम व डोंगराळ भागातील विकासकामे मार्गी लागणार आहेत. यासाठी मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार व ग्रामविकास व पंचायतराज मंत्री गिरीश महाजन व पालकमंत्री दिपक केसरकर यांचे सहकार्य लाभले.