राज्य निवड बुद्धिबळ स्पर्धा शुक्रवारपासून
कोल्हापूर, ता . २१ ः सात वर्षाखालील मुले व मुलींच्या राज्य निवड बुद्धिबळ स्पर्धा २५ ते २७ ऑगस्ट होत आहे. स्पर्धेसाठी जिल्हा स्पर्धांमधून निवड झालेले खेळाडू सहभागी होणार असल्याची माहिती महाराष्ट्र बुद्धिबळ संघटनेचे सहसचिव भरत चौगुले यांनी पत्रकार परिषदेमध्ये दिली.
ते म्हणाले, ‘‘अखिल भारतीय बुद्धिबळ संघटना, महाराष्ट्र बुद्धिबळ संघटना व कोल्हापूर जिल्हा बुद्धिबळ संघटनेच्या मान्यतेने पोदार इंटरनॅशनल स्कूल व ज्युनिअर कॉलेजच्या सभागृहात महाराष्ट्र राज्य सात वर्षाखालील मुला-मुलींच्या निवड बुद्धिबळ स्पर्धेचे आयोजन केले आहे. स्पर्धा स्विस लीग पद्धतीने आंतरराष्ट्रीय बुद्धिबळाच्या नियमानुसार होणार आहे.’’
स्पर्धेसाठी आलेल्या खेळाडूंसह पालकांना शाळेच्या बसची सुविधा उपलब्ध करून देण्यात आली असल्याची माहिती प्राचार्या शिल्पा कपूर यांनी दिली. स्पर्धेत मुख्य पंच म्हणून आंतरराष्ट्रीय पंच नितीन शेणवी यांची नियुक्ती महाराष्ट्र बुद्धिबळ संघटनेने केली आहे. स्पर्धेतून मुलांच्या गटातून दोन व मुलींच्या गटातून दोन बुद्धिबळपट्टूची निवड कोलकत्ता येथे होणाऱ्या राष्ट्रीय निवड स्पर्धेसाठी राज्य संघात होणार आहे. या वेळी मुख्य स्पर्धा संचालक मनिष मारुलकर, समन्वयक धीरज वैद्य, आरती मोदी, उप प्राचार्या मनिषा आमराळे व्यवस्थापक सुरेश देसाई व क्रीडा समन्वयक संजय चिले उपस्थित होते.