32807
...
सकल मराठा समाजाची निदर्शने

जिल्हाधिकाऱ्यांना निवेदनः नोकऱ्यांचे कंत्राटीकरण रद्द करण्याची मागणी

सकाळ वृत्तसेवा
कोल्हापूर, ता. २२ : शासनाने शासकीय, निमशासकीय नोकर भरतीसाठी कंत्राटीकरण सुरू केले आहे. यामुळे नोकरी व शिक्षणाचे महत्त्व संपुष्टात येणार आहे. शासनाच्या या धोरणाचा निषेध करत शिवाजी पेठ येथील सकल मराठा समाजाच्यावतीने जिल्हाधिकारी कार्यालयासमोर निदर्शने करून जिल्हाधिकाऱ्यांना निवेदन देण्यात आले. तसेच नोकऱ्यांचे कंत्राटीकरण रद्द करावे, या मागणीसाठी २ ऑक्टोबरपासून शिवाजी पेठ येथे लाक्षणिक उपोषण करण्याचाही इशारा दिला आहे.

यावेळी देण्यात आलेल्या निवेदनात म्हटले आहे की, महाराष्ट्र शासनाने शासकीय, निमशासकीय नोकऱ्यांत खासगीकरण, कंत्राटीकरणाचा ठराव केला आहे. शैक्षणिक क्षेत्रातही सरकारी शाळांचे खासगी व्यक्तींना हस्तांतरण केले जाणार आहे. या ‘अधोगतीमान सरकार’ने आपल्याच आमदारांच्या खासगी कंपन्यांना कंत्राटीकरणाचे धोरण राबविण्यासाठी मान्यता दिली आहे. यामुळे सर्वसामान्य, गोरगरीब जनतेच्या शिक्षण व नोकरीबाबत अनेक अडचणी येणार आहेत. प्रत्यक्षात नोकरी व शिक्षणाचे विश्वासार्ह भवितव्य संपुष्टात आले आहे. मराठा समाजाला आरक्षण मिळावे, या मागणीसाठी आंदोलने केली जात आहेत. आरक्षण मिळाल्यानंतर त्यांना सरकारी नोकऱ्या व शैक्षणिक क्षेत्रात लाभ कसा मिळणार? याचा विचार केलेला नाही. नोकऱ्यांचे कंत्राटीकरण झाल्यास मराठा आरक्षण मिळूनही उपयोग होणार नाही. त्यामुळे शासनाने खासगीकरण व कंत्राटीकरणाचे धोरण त्वरित रद्द करावे.
यावेळी अॅड. अजित चव्हाण, संजय साळोखे, विकास जाधव, रवी चव्हाण, जयंत मिठारी, आनंदराव चौगुले, चंद्रकांत यादव, अनिल चव्हाण, शिवाजी पाटील, अमर जाधव, राजेंद्र खट्टे, चंद्रशेखर पाटील, अॅड. अमर गोनुगडे, अॅड. वाय.पी. ऊगवे, अॅड. चंद्रकांत पाटील, बाबूराव कदम आदी उपस्थित होते.
...

गांधी जयंतीपासून शिवाजी पेठेत उपोषण

कंत्राटीकरण, शिक्षणाचे खासगीकरण करण्याच्या सरकारच्या धोरणाच्या निषेधार्थ २ ऑक्टोबरला महात्मा गांधी जयंतीपासून शिवाजी पेठ येथील उभा मारुती चौकात उपोषण व लाक्षणिक धरणे आंदोलन होईल. या प्रश्नाचे गांभीर्य शासनाने जाणून घेऊन हा निर्णय त्वरित रद्द करावा अन्यथा तीव्र आंदोलन केले जाईल, असा इशाराही यावेळी देण्यात आला.