खुपीरेतील दुचाकी चोरट्याला अटक

१ लाख ६० हजारांच्या ८ दुचाकी जप्त

सकाळ वृत्तसेवा
कोल्हापूर, ता. २४ ः दुचाकी चोरटा संभाजी यल्लाप्पा नंदीवाले (वय ३५, रा.शिंदेवाडी रोड, खुपीरे, ता.करवीर) याला पोलिसांनी अटक केली. त्याच्याकडून ८ दुचाकी जप्त करण्यात आल्या. या दुचाकींची किंमत सुमारे १ लाख ६० हजार रुपये इतकी आहे. त्याला न्यायालयात हजर केले असता मंगळवार (ता.२६) पर्यंत पोलिस कोठडी देण्यात आली आहे. अशी माहिती पोलिस निरीक्षक अरविंद काळे यांनी आज पत्रकार परिषदेत दिली. यावेळी पोलिस उपअधीक्षक संकेत गोसावी उपस्थित होते.
पोलिस निरीक्षक काळे यांनी दिलेल्या माहितीनुसार, करवीर पोलिस ठाण्यातील कर्मचारी बालिंगा, दोनवडे मार्गे खुपीरे या मार्गावरून निघालेले असताना त्यांना नंबरप्लेट नसलेली एक दुचाकी आढळली. त्यांनी दुचाकी थांबवली व चौकशी केली असता दुचाकी चालवणाऱ्या संभाजी नंदीवाले याने उडवाउडवीची उत्तरे दिली. त्यानंतर सखोल चौकशी केली असता ही दुचाकी चोरीची असल्याचे निष्पन्न झाले. त्यानंतर संभाजी याला अटक करून त्याच्याकडे चौकशी केली असता त्याने लक्ष्मीपुरी पोलिस ठाण्याच्या हद्दीतून दोन आणि करवीर पोलिस ठाण्याच्या हद्दीतून ३ दुचाकी चोरल्याची माहिती पुढे आली. त्यानंतर पोलिसांनी त्याच्याकडून एकूण ८ दुचाकी जप्त केल्या. संबंधित पोलिस ठाण्याकडे या दुचाकी दिल्या जाणार आहेत. जप्त करण्यात आलेल्या दुचाकींपैकी ३ दुचाकींचे मालक निष्पन्न झाले आहेत. दरम्यान, या दुचाकी संभाजी हा कोकणात विकणार होता. मात्र एजंट न मिळाल्याने त्या अद्याप विकलेल्या नव्हत्या, असेही पोलिसांनी सांगितले.
ही कारवाई सहायक पोलिस निरीक्षक शिवाजी करे, हेड कॉन्स्टेबल सुभाष सरवडेकर, विजय तळसकर, सुजय दावणे, रणजित पाटील, अमोल चव्हाण यांच्यासह कर्मचाऱ्यांनी केली.