42992

सी, डी वॉर्डमध्ये पाणीटंचाई तीव्र
कोल्हापूर, ता. ३ ः बालिंगा केंद्राच्या चॅनेलचे काम सुरू झाल्यानंतर आज सी, डी वॉर्डमधील पाणी टंचाई तीव्र झाली. त्यामुळे १८ टॅंकरच्या २५ फेऱ्यांद्वारे नागरिकांना पाणीपुरवठा करण्याचा प्रयत्न केला. नागदेववाडी उपसा केंद्र सुरू असल्याने काही भागात कमी दाबाने तरी पाणी आले.
चॅनेलमधील मलबा काढण्यासाठी आज प्रत्यक्षात कामाला सुरूवात झाल्याने बालिंगा उपसा केंद्र दुपारपासून बंद ठेवावे लागले; पण नागदेववाडी येथील केंद्र सुरूच ठेवून त्यातून मिळणारे पाणी चंबुखडीद्वारे शहरातील काही भागात पाठवले जात होते. त्यामुळे काही भागात कमी दाबाने पाणी येत होते. उर्वरित सी, डी वॉर्डमध्ये मात्र टंचाई तीव्र झाली. अनेकांनी चार दिवस पाणी येणार नाही म्हणून कालच मिळेल त्या साहित्यात टॅंकरद्वारे मिळालेले पाणी भरून ठेवले होते. त्यामुळे आज तुलनेने टॅंकरची मागणी कमी झाली. तसेच टॅंकरची संख्याही वाढवून १८ करण्यात आली. या टॅंकरकडून मध्यवस्तीच्या भागात २५ फेऱ्या करण्यात आल्या. त्याचे पाणी भरण्यासाठी नागरिकांची मोठी गर्दी होत होती.
शहराच्या दाटवस्तीत पाण्याची गरज भासत आहे. तेथील गल्लीबोळातील नागरिकांना पाणी मिळवण्यासाठी मुख्य रस्त्यावर उभ्या असलेल्या टॅंकरमधून पाणी भरावे लागत असल्याने काही ठिकाणी महापालिकेबाबत राग व्यक्त केला जात आहे. दुपारी सुरू झालेले काम आणखी दोन दिवस सुरू राहील असे सांगण्यात येत आहे. तोपर्यंत नागदेववाडी केंद्रातून काही प्रमाणात पाणी दिले जात आहे. थेट पाईपलाईनचे पाणीही लवकर देण्याचा पाणीपुरवठा विभागाचा प्रयत्न आहे. शहरातील इतर भागात मात्र व्यवस्थित पाणीपुरवठा सुरू आहे.