‘दूरशिक्षण’च्या घटत्या
संख्येची कारणे शोधणार

विद्यापीठाकडून समिती गठीतः कर्मचाऱ्यांना मिळणार सातवा वेतन आयोगाचा फरक

सकाळ वृत्तसेवा
कोल्हापूर, ता. १० ः दूरशिक्षण आणि ऑनलाईन शिक्षण केंद्राच्या घटत्या विद्यार्थी संख्येची कारणे शोधण्याचा निर्णय शिवाजी विद्यापीठाने घेतला आहे. त्यासाठी आज समिती नियुक्त करण्यात आली. त्याला व्यवस्थापन परिषदेने मान्यता दिली. तृतीय आणि चतुर्थश्रेणीतील कर्मचाऱ्यांना सातव्या वेतन आयोगाचा फरक ॲडव्हान्स स्वरूपात देण्यास मान्यता देण्यात आली.
व्यवस्थापन परिषदेच्या बैठकीत विविध विषयांवर चर्चा करण्यात आली. या परिषदेचे सदस्य ॲड. स्वागत परूळेकर यांनी दूरशिक्षण केंद्राच्या विद्यार्थी संख्येतील वाढीबाबत उपाययोजना करण्यात याव्यात, अशी मागणी विद्यापीठाकडे पत्राद्वारे केली होती. याविषयावर आजच्या बैठकीत चर्चा झाली. या केंद्रातील विद्यार्थ्यांची घटती विद्यार्थी संख्येची कारणे शोधण्यासह ती संख्या वाढविण्याबाबत उपाययोजना सुचविण्यासाठी चार सदस्यीय समिती नियुक्त करण्यात आली. उजळाईवाडी, मोरेवाडी परिसरातून विद्यापीठ परिसरात येणाऱ्या सांडपाण्याचे व्यवस्थापन करणारा प्रकल्प किर्लोस्कर ऑईल इंजिन कंपनीच्या सहयोगाने करण्यास व्यवस्थापन परिषदेने मान्यता दिली. संशोधनाचा टक्का वाढावा यासाठी विद्यापीठ आणि महाविद्यालयांतील शिक्षक, संशोधक विद्यार्थ्यांसाठी प्रोत्साहन देण्यासाठी पुरस्कार सुरू करण्याचा निर्णय घेण्यात आला.
...
बटरफ्लाय गार्डन पाहण्यास शुल्क आकारणी
विद्यापीठातील प्राणीशास्त्र अधिविभाग आणि तेथील बटरफ्लाय गार्डन पाहण्यासाठी येणाऱ्या अभ्यागत, शैक्षणिक सहलीतून येणाऱ्या विद्यार्थ्यांकडून शुल्क आकारण्यास मान्यता देण्यात आली. विद्यार्थी कल्याण निधीचे प्रस्ताव ज्या दोन महाविद्यालयांनी वेळेत पाठविले नाहीत. त्यांच्यावर दंडात्मक कारवाई करण्यास मान्यता देण्यात आली.
...........