बंद कूपनलिकांची दुरुस्ती मोहिम
आमदार आवाडे यांचा पुढाकार ः नागरिकांना पाण्याची सुविधा उपलब्ध
सकाळ वृत्तसेवा
इचलकरंजी, ता.२८ ः इचलकरंजी महापालिका हद्दीतील प्रदीर्घकाळापासून बंद पडलेल्या कुपनलिकांची दुरुस्ती मोहिम सुरु केली आहे. यासाठी आमदार प्रकाश आवाडे यांच्याकडून स्वखर्चातून हा उपक्रम राबवण्यात येत आहे. त्यानुसार विविध भागातील कुपनलिकांची युध्दपातळीवर दुरुस्ती करण्यात येत आहे. त्यामुळे नागरिकांना पाण्याची सुविधा उपलब्ध होत आहे.
इचलकरंजी शहराला भेडसावणारी पाणीटंचाई दूर व्हावी या उद्देशाने शहरातील विविध भागात मोठ्या प्रमाणात कुपनलिकांची खुदाई केली. परंतु यापैकी अनेक कुपनलिका नादुरुस्त झाल्या आहेत. काही कुपनलिकांच्या विद्युत मोटारी खराब झाल्याने त्या बदलण्याची गरज आहे. यासंदर्भात अनेक भागातून नागरिकांनी व भागातील लोकप्रतिनिधींनी आमदार आवाडे यांच्याकडे बंद अवस्थेतील कुपनलिकांची दुरुस्ती करुन पाण्याची सुविधा करुन देण्याबाबत मागणी केली होती. त्या अनुषंगाने आमदार आवाडे यांनी सविस्तर माहिती जाणून घेत बंद पडलेल्या व दुरुस्ती होऊ शकणाऱ्‍या अशा कुपनलिकांची जबाबदारी स्विकारली. त्या कूलनलिका स्वखर्चातून त्यांची दुरुस्ती करण्याची तयारी दर्शवली आणि त्याचे कामही सुरु केले. त्यानुसार बंद अवस्थेतील कुपनलिकांच्या दुरुस्तीचे काम सुरु करण्यात आले. हे काम तातडीने पूर्ण होऊन भागातील नागरिकांना भेडसावणारा पाणीप्रश्‍न दूर होणार असल्याने नागरिकांतून समाधान व्यक्त होत आहे.