आजरा तालुक्यात दोन गव्यांचा मृत्यू
खानापूर येथे ह्रदयविकाराने तर मडिलगे येथे जखमी झाल्याने मृत्यू
आजरा,ता.६ : खानापूर (ता. आजरा) येथे रस्त्याशेजारी गव्याचा मृतदेह आढळून आला. ह्रदयविकाराच्या धक्याने मृत्यू झाल्याचा निष्कर्ष काढण्यात आला आहे. तर मडिलगे येथे जखमी झाल्याने गव्याचा मृत्यू झाला.
खानापूर येथील मरगूबाईच्या मंदिराजवळ सकाळी गवा मृत्यू झाल्याचे ग्रामस्थांना आढळून आले. याबाबतची माहिती वनविभागाला कळविल्यानंतर वनविभागाच्या पथकाने पंचनामा केला. यामध्ये पशुवैद्यकिय अधिकारी डॉ.पी डी ढेकळे, वनरक्षक दयानंद शिंदे, गंगाराम कोकरे यांच्या पथकाने पंचनामा केला. यावेळी शवविच्छेदनात ह्रदयविकाराच्या धक्क्याने गव्याचा मृत्यू झाल्याचे स्पष्ट झाले. मडिलगे येथे पशुधन विकास अधिकारी आकाश वाघमोडे यांनी शवविच्छेदन केले. यावेळी वनपाल बाळेश न्हावी, वनरक्षक अस्मिता घोरपडे, दयानंद शिंदे, वन कर्मचारी प्रविण कांबळे, अक्षय पाटील आदी उपस्थित होते.