कृषि यांत्रिकीकरण दिवस उद्या
कोल्हापूर, ता. ३ ः राजर्षी छत्रपती शाहू महाराज कृषी महाविद्यालयात भारतीय कृषी अनुसंधान परिषद यांच्या अखिल भारतीय समन्वित कृषी अवजारे व यंत्रे संशोधन प्रकल्प व कृषी अवजारे उत्पादक संघटना यांच्या संयुक्त विद्यमाने मंगळवारी (ता. ५) कृषि यांत्रिकीकरण दिवस साजरा होणार आहे. यानिमित्ताने सुधारित कृषी अवजारांचे प्रदर्शन व प्रात्यक्षिके दाखविले जाणार आहे. महाराष्ट्र कृषी शिक्षण व संशोधन परिषदेचे उपाध्यक्ष प्रकाश आबिटकर, केंद्रीय कृषि मंत्रालयाच्या यांत्रिकीकरण व तंत्रज्ञान विभागाचे अतिरिक्त आयुक्त डॉ. विजय काळे, चेन्नई येथील कृषी अभियांत्रिकी विभागाचे मुख्य अभियंता डॉ. थिरू आर. मुरूगेसन व परिषदेचे सदस्य दत्तात्रय उगले यांच्या उपस्थितीत हा कार्यक्रम होईल. जिल्ह्यातील पीक पद्धती लक्षात घेऊन ऊस, भुईमूग, भात, सोयाबीन या पिकांसोबतच फळपिके व भाजीपाला पिकांसाठी उपयुक्त कृषी अवजारांचा यामध्ये समावेश होईल. या प्रदर्शनाला उपस्थित राहण्याचे आवाहन महाविद्यालयाचे सहयोगी अधिष्ठाता डॉ. साताप्पा खरबडे, डॉ. तुळशीराम बास्टेवाड, कृषी अधिकारी अरुण भिंगारदिवे यांनी केले.