शासकीय यंत्रणेच्या गैरवापराचा
भाजपवर बूमरँग होणार ः सुषमा अंधारे

कोल्हापूर, ता. २५ : भाजपकडून शासकीय यंत्रणेचा गैरवापर होईल, तितकेच त्यांच्यावर बूमरँग होणार आहे. याच कारणामुळे लोक भाजपवर चिडलेले आहेत, त्या लोकांना जास्त चिडवण्याचे कामही भाजपकडून केले जात आहे. लोक भाजपच्या याच कृत्याची प्रतिक्रिया मतपेटीतून दिल्याशिवाय राहणार नाहीत, अशी टीका शिवसेना उपनेत्या सुषमा अंधारे यांनी आज केली.
शिंदे गटाच्या ज्या खासदारांना लोकसभेचे तिकीट मिळाले आहे ते विजयी होणार नाहीत, त्यामुळे त्यांना कधीही उद्धव ठाकरे यांच्याकडे यावे लागणार असल्याने ते आता ठाकरे यांच्याविरोधात बोलत नसल्याचेही अंधारे यांनी सांगितले.
त्या म्हणाल्या, ‘पंतप्रधान नरेंद्र मोदी विकासकामांवर, महागाईवर, महिला सुरक्षेवर बोलतील असे वाटत होते. जाती-धर्मांवर आधारित मते मागण्याऐवजी विकासकामे काय केली हे सांगून मते मागावीत. उपमुख्यमंत्री देवेंद्र फडणवीस हे गोड बोलण्याचा प्रयत्न करतात. त्यांना आम्ही महिला अत्याचारांबद्दल श्र्वेतपत्रिका काढा म्हणून मागणी करत आहे; पण त्यांच्याकडून ती काढली जात नाही.’
शिवसेना उपनेते संजय पवार, रविकिरण इंगवले, हर्षल सुर्वे, स्मिता सावंत, मंजित माने उपस्थित होते.

चौकट
महाडिक, पवारांच्या वक्तव्याकडे दुर्लक्ष
संजय मंडलिकांना विजयी करा, आम्ही पाच कोटींचा निधी देऊ, हे धनंजय महाडिक यांनी जाहीर करणे आणि बारामतीमध्ये अजित पवार यांनी आमच्या चिन्हावर कचाकचा बटण दाबा आणि तसाच कचाकचा निधी घ्या, हे वक्‍तव्य म्हणजे आचारसंहितेचा भंग करण्याचा प्रकार आहे. यावर निवडणूक आयोगाची नोटीस काढली जात नसल्याचा आरोपही अंधारे यांनी केला.